UP: విడిపోయిన భార్యే సవతి తల్లి..!

బదాయూ: ఐదేళ్ల క్రితం మైనర్లుగా ఉన్నప్పుడే వారిద్దరు పెళ్లిచేసుకున్నారు. ఆ తర్వాత 6 నెలలకే భర్త తాగుబోతంటూ ఆమె వదిలేసింది. కలసి ఉండడానికి అతడు ఎంత ప్రయత్నించినా ససేమిరా అంది. కొంతకాలానికి ఆ యువకుడి తండ్రి ఇల్లు వదిలి వెళ్లిపోయాడు. ఆయన కోసం వెతుకుతున్న క్రమంలో.. తనను వదిలేసిన మహిళను తండ్రి పెళ్లిచేసుకున్నాడని తెలిసి నిర్ఘాంతపోయాడు. విడిపోయిన భార్య కాస్తా.. ఇప్పుడు తనకు సవతి తల్లి కావడంతో షాక్‌ అయ్యాడు. ఉత్తర్‌ప్రదేశ్‌లోని బదాయూలో ఈ అనూహ్య సంఘటన జరిగింది. ఇల్లు వదిలివెళ్లిన తన తండ్రి ఆచూకీ కనిపెట్టాలని ఆ యువకుడు అధికారులను ఆశ్రయించగా.. వారి అన్వేషణలో అసలు కథ బయటపడింది. 48 ఏళ్ల ఆ తండ్రి కొన్నేళ్ల క్రితం కుమారుడు పెళ్లిచేసుకున్న అమ్మాయిని తిరిగి వివాహమాడి, సంభాల్‌ ప్రాంతంలో కలిసి జీవిస్తున్నాడని తెలిసింది. దీనిపై ఆ వ్యక్తి బిసౌలీ పోలీస్‌ స్టేషన్‌లో ఫిర్యాదు చేశాడు. ఆమె మాత్రం రెండో భర్తతోనే సంతోషంగా ఉన్నానని, మొదటి భర్త దగ్గరకు వెళ్లే ప్రసక్తే లేదని తేల్చిచెప్పింది.