India Corona: భారీ ఊరట.. 24 గంటల్లో 27 మరణాలే..!

కొత్త కేసులు 2,500 మాత్రమే..

దిల్లీ: దేశంలో ఈ రెండేళ్లలో ఎన్నడూ లేనివిధంగా కరోనా కొత్త కేసులు, మరణాల్లో గణనీయ తగ్గుదల నమోదైంది.  వైరస్ వ్యాప్తి 2020 మే ప్రారంభం నాటి స్థాయికి తగ్గిపోయి భారీ ఊరటనిస్తోంది. గత 24 గంటల వ్యవధిలో కేవలం 2,503 కేసులు, 27 మరణాలు మాత్రమే నమోదయ్యాయి. ఆదివారం 5,32,332 మందికి నిర్ధారణ పరీక్షలు నిర్వహించగా.. ఈ స్థాయిలో కేసులు క్షీణించాయి. పరీక్షలు సంఖ్య తగ్గినప్పటికీ.. పాజిటివిటీ రేటు మాత్రం ఒక శాతం దిగువనే ఉంది. సోమవారం కేంద్ర ఆరోగ్యశాఖ వెల్లడించిన గణాంకాల ప్రకారం...

ఇప్పటివరకూ 4.29 కోట్ల మందికి కరోనా సోకింది. అందులో 4.24 కోట్ల మంది వైరస్‌ నుంచి బయటపడగా.. రికవరీ రేటు 98.72 శాతానికి చేరింది. 5.15 లక్షల మందికి పైగా మృత్యుఒడికి చేరుకున్నారు. ఇటీవల కాలంలో రోజూవారీ మరణాలు 100 దిగువన నమోదవుతున్నాయి. ముందురోజు ఆ సంఖ్య 47గా ఉండగా.. తాజాగా 27కి చేరింది. ఇక కొవిడ్ బాధితుల సంఖ్య గణనీయంగా తగ్గుతోంది. ప్రస్తుతం క్రియాశీల కేసుల సంఖ్య 36,168గా ఉంది. దాంతో యాక్టివ్‌ కేసుల రేటు 0.08 శాతానికి క్షీణించింది. కరోనా కట్టడికి కేంద్రం ప్రారంభించిన టీకా కార్యక్రమంలో భాగంగా ఇప్పటి వరకూ 180 కోట్లకు పైగా డోసులు పంపిణీ అయ్యాయి.