మమతా బెనర్జీకి గాయం

కోల్‌కతా: పశ్చిమ బెంగాల్‌ ముఖ్యమంత్రి, తృణమూల్‌ కాంగ్రెస్‌ అధినేత్రి మమతా బెనర్జీ గాయపడ్డారు. నందిగ్రామ్‌లో ఎన్నికల ప్రచార సమయంలో ఆమె కాలికి గాయమైంది. తాను కారు వద్ద నిల్చుని ఉండగా.. కొందరు వ్యక్తులు కారు డోరును బలంగా తోయడంతో తన కాలికి గాయమైందని మమత చెప్పారు. దీంతో కాలు వాపు వచ్చిందని తెలిపారు. దీని వెనుక కుట్ర దాగి ఉందని అనుమానం వ్యక్తంచేశారు. ఆ సమయంలో స్థానిక పోలీసులెవరూ తన చుట్టూ లేరని పేర్కొన్నారు. దీనిపై ఎన్నికల సంఘానికి ఫిర్యాదు చేస్తానని తెలిపారు. గాయపడిన మమతను పార్టీ శ్రేణులు కోల్‌కతాకు తరలించాయి. 

ఎన్నికల ప్రచారంలో భాగంగా మమతా బెనర్జీ కోల్‌కతా నుంచి మంగళవారం నందిగ్రామ్‌ చేరుకున్నారు. బుధవారం ఉదయం వివిధ దేవాలయాల్లో పూజల అనంతరం హల్దియాలో నామినేషన్‌ దాఖలు చేశారు. ఈ రాత్రికి నందిగ్రామ్‌ నియోజకవర్గంలోనే బస చేయాల్సి ఉండగా ఈ ఘటన జరిగింది. దీంతో ఆమె పర్యటన అర్ధంతరంగా ముగిసింది. నందిగ్రామ్‌ నుంచి భాజపా తరఫున సువేందు అధికారి పోటీ చేస్తున్నారు.