భారత ఉత్పత్తులపై పాక్‌ కీలక నిర్ణయం

 పత్తి, చక్కెర దిగుమతి చేసుకోనున్న పొరుగుదేశం

ఇస్లామాబాద్‌: భారత ఉత్పత్తులపై పాక్‌ కీలక నిర్ణయం తీసుకుంది. భారత్‌ నుంచి పత్తి, చక్కెర దిగుమతి చేసుకొనే విషయంపై 19 నెలలుగా ఉన్న నిషేధాన్ని ఎత్తివేస్తున్నట్లు పాక్‌ బుధవారం ప్రకటించింది. దీంతో ఈ ఏడాది జూన్‌ 30 నుంచి పత్తి, చక్కెరలను దిగుమతి చేసుకోనున్నట్లు కొత్తగా ఆ దేశ ఆర్థిక మంత్రిగా నియమితులైన హమద్‌ అజర్‌ తెలిపారు. ‘చక్కెర ధర భారత్‌లో తక్కువగా ఉంటుంది. ఈ క్రమంలో ఇండియా నుంచి అయిదు లక్షల టన్నుల చక్కెరను దిగుమతి చేసుకోవడానికి పాకిస్థాన్ ఎకనమిక్‌ కో-ఆర్డినేషన్‌ కమిటీ(ఈసీసీ) అనుమతి ఇచ్చింది. దీంతో ఇరు దేశాల మధ్య వ్యాపార సంబంధాలు మళ్లీ ప్రారంభంకానున్నాయి. అదే విధంగా పత్తిని కూడా పాక్‌  దిగుమతి చేసుకోనుంది. ఈ చర్యతో  దేశంలోని చిన్న, మధ్యతరహా పరిశ్రమలకు నేరుగా లబ్ధి చేకూరనుంది’ అని ఆర్థిక మంత్రి వివరించారు. 2019 ఆగస్టులో జమ్ము-కశ్మీర్‌కు ప్రత్యేక హోదాను రద్దు చేయడంతో భారత్‌, పాక్‌ల మధ్య వ్యాపార సంబంధాలు నిలిచిపోయిన విషయం తెలిసిందే..