Putin: ఓపెన్‌ స్కైస్‌ ఒప్పందం నుంచి రష్యా బయటకు

ఇంటర్నెట్‌డెస్క్‌: ఓపెన్‌స్కైస్‌ ఒప్పందం నుంచి బయటకు వచ్చేసినట్లు రష్యా అధ్యక్షుడు వ్లాదిమిర్‌ పుతిన్‌ వెల్లడించారు. ఈ మేరకు ఒప్పందం నుంచి బయటకు వచ్చే బిల్లుపై ఆయన సంతకం చేశారు. గత నెలలోనే అమెరికా కూడా ఈ ఒప్పందంలో మళ్లీ కొనసాగే ఆలోచన లేదని రష్యాకు వెల్లడించింది. బైడెన్‌ కంటే మందు అధ్యక్షుడిగా వ్యవహరించిన ట్రంప్‌ కూడా ఈ ఒప్పందంలో అమెరికా కొనసాగదని వెల్లడించారు. 

అమెరికా ఎన్నికల సమయంలో ఈ ఒప్పందం నుంచి వైదొలిగే విషయంలో ట్రంప్‌ను తప్పు పట్టారు. కానీ, తర్వాత బైడెన్‌ సర్కారు కూడా అదేబాట పట్టింది. తాజాగా పుతిన్‌ బిల్లుపై సంతకం చేయడంతో మరో ఆరు నెలల్లో రష్యా ఈ ఒప్పందం నుంచి బయటకు వెళ్లిపోవడం ఖాయమైంది. ప్రచ్ఛన్న యుద్ధకాలంలో అణ్వాయుధ మోహరింపులు, అనుమానాస్పద కార్యకలాపాలు సాగించకుండా విమానాల్లో నిఘా పెట్టడానికి కుదిరిన ఒప్పందం ఇది. 2002లో అమల్లోకి వచ్చిన ఈ ఒప్పందం కారణంగా దాదాపు 1500 సార్లు విమానాలతో  ఇరు దేశాల గగనతలంలో సర్వేలు నిర్వహించారు. రష్యా ఈ ఒప్పంద నియమాలను ఉల్లంఘించిందని ట్రంప్‌ గతేడాది ఆరోపించారు. అనంతరం ఈ ఒప్పందం నుంచి బయటకు వస్తున్నట్లు ప్రకటించారు. ఈ ఆరోపణలను రష్యా ఖండించింది.