ED Raids: ఆదిత్య ఠాక్రే సన్నిహితుడి ఇంట్లో ఈడీ సోదాలు.. మండిపడ్డ శివసేన

ముంబయి: మహారాష్ట్రలోని 12 చోట్ల ఎన్‌ఫోర్స్‌మెంట్‌ డైరెక్టరేట్‌ (ఈడీ) ఈరోజు ఏకకాలంలో సోదాలు నిర్వహించింది. అయితే ఈ 12 మందిలో ముగ్గురు శివసేనకు చెందిన నేతలే ఉండటం గమనార్హం. మహారాష్ట్ర మంత్రి ఆదిత్య ఠాక్రేకు అత్యంత సన్నిహితుడు, శివసేన నేత రాహుల్‌ కనాల్‌ ఇంట్లోనూ ఈడీ సోదాలు చేపట్టింది. ఆయన శిర్డీ ట్రస్ట్‌ మెంబర్‌ కూడా. కాగా ఈ దాడులపై శివసేన మండిపడింది. కేంద్రం ఉద్దేశపూర్వకంగానే భాజపేతర రాష్ట్రాలైన బెంగాల్‌, మహారాష్ట్రను లక్ష్యంగా చేసుకొని ఈ తరహా దాడులు చేయిస్తోందని మండిపడింది.

ఈడీ సోదాల అనంతరం ఆదిత్య ఠాక్రే స్పందిస్తూ.. దర్యాప్తు సంస్థలు భాజపాకు ప్రచార యంత్రాల్లా మారాయని ఆరోపించారు. ఈ తరహా దాడులు మహారాష్ట్రపై గతంలోనూ జరిగాయని, ఇప్పుడు కూడా జరుగుతున్నాయని తెలిపారు. ‘కేంద్ర దర్యాప్తు సంస్థలను గతంలోనూ ఇలా దుర్వినియోగం చేశారు. ఎన్నికలకు ముందు బెంగాల్‌, ఆంధ్రప్రదేశ్‌లోనూ ఇలా దాడులు జరిగాయి. ఈ సంస్థలు ఒక రకంగా భాజపాకు ప్రచార యంత్రాల్లా మారాయి. కానీ మేము తలవంచబోం’ అని పేర్కొన్నారు.

శివసేన సీనియర్‌ నేత సంజయ్‌ రౌత్‌ భాజపా ప్రభుత్వంపై విమర్శలు గుప్పించారు. ఎన్‌ఫోర్స్‌మెంట్‌ డైరెక్టరేట్‌ని కేంద్ర ఏజెంట్‌గా పోలుస్తూ.. ఈ విభాగం దోపిడీకి పాల్పడుతోందని ఆరోపించారు. ‘మహారాష్ట్ర, పశ్చిమ బెంగాల్‌లోని ప్రజలను మాత్రమే ఎందుకు లక్ష్యంగా చేసుకుంటున్నారు? శివసేన, తృణమూల్ కాంగ్రెస్‌పైనే దాడి చేస్తున్నారు. ఈ రాష్ట్రాలపై ఒత్తిడి పెంచి ప్రభుత్వాలను పడగొట్టేందుకే కేంద్రం ఇలా చేస్తోంది’ అని రౌత్‌ ఆరోపించారు. కానీ దేశంలోని ఏ ఒక్క భాజపా నేత ఇంట్లో సోదాలు చేయడంలేదన్నారు. 50 మంది భాజపా నేతల అక్రమాలపై తాము ఆదాయపు పన్ను శాఖ, ఈడీకి సమాచారం ఇచ్చామని.. కానీ వారిపై ఎలాంటి చర్యలు తీసుకోలేదని వెల్లడించారు.