Viral video: మహిళను కారులోకి లాక్కెళ్లి.. కొట్టడంపై DCW సీరియస్‌!

దిల్లీ: దేశ రాజధాని నగరంలో రోడ్డుపై ఓ మహిళను బలవంతంగా కారులోకి లాక్కెళ్లి దాడి చేసిన వీడియో వైరల్‌(viral video) కావడంతో దిల్లీ మహిళా కమిషన్‌(DCW) సీరియస్‌గా స్పందించింది. దీనిపై తక్షణమే చర్యలు తీసుకోవాలని పోలీసులను ఆదేశించింది. ఈ మేరకు దిల్లీ మహిళా కమిషన్‌ ఛైర్‌పర్సన్‌ స్వాతి మాలివాల్‌(Swath maliwal) పోలీసులకు లేఖ రాశారు.  ఈ ఘటనలో తీసుకున్న చర్యలపై ఈ నెల 23 లోపు తమకు నివేదిక సమర్పించాలని ఆదేశించారు. మరోవైపు, ఓ మహిళను బలవంతంగా కారులోకి నెట్టేసి.. ఆపై ఆమెను కొట్టినట్లుగా రికార్డయిన వీడియో వైరల్‌ కావడంతో పోలీసులు సైతం అప్రమత్తమయ్యారు. ఈ ఘటన దిల్లీలోని మంగోల్‌పురి ఫ్లైఓవర్‌ సమీపంలో శనివారం రాత్రి 9.45 గంటల సమయంలో చోటుచేసుకుందని తెలిపారు. ఆ  క్యాబ్‌ను గుర్తించినట్టు వెల్లడించారు.

హరియాణా రిజిస్ట్రేషన్‌ నంబర్‌తో ఉన్న ఈ కారు గుడ్‌గావ్‌లోని రతన్‌ విహార్‌ ప్రాంతానికి చెందినదిగా పోలీసులు గుర్తించారు. దీనిపై ఔటర్‌ దిల్లీ  డిసీపీ హరేంద్ర కుమార్‌ సింగ్‌ మాట్లాడుతూ..  ఆ కారు డ్రైవర్‌ ఆచూకీని గుర్తించినట్టు చెప్పారు. ఇది ఉబర్‌ క్యాబ్‌ అని.. దీన్ని రోహిణి నుంచి వికాస్‌పురికి ఇద్దరు యువకులతో పాటు ఓ మహిళ బుక్‌ చేసుకున్నట్టు చెప్పారు. మార్గమధ్యంలో ఈ ముగ్గురికీ గొడవ తలెత్తగా.. మహిళ బయటకు వెళ్లాలనుకుందని వివరించారు. ఈ ఘటనపై దర్యాప్తు కొనసాగుతోందని పోలీసులు తెలిపారు. ఈ దాడి ఘటన వీడియోను ట్విటర్‌లో షేర్‌ చేసిన దిల్లీ మహిళా కమిషన్‌ ఛైర్‌పర్సన్‌ స్వాతి మాలివాల్‌.. నిందితులపై కఠిన చర్యలు తీసుకుంటామని హామీ ఇచ్చారు. ఈ ఘటనను సుమోటోగా తీసుకున్నట్టు పేర్కొన్నారు. దీనిపై  దిల్లీ పోలీసులకు నోటీసులు జారీ చేస్తున్నట్టు తెలిపారు.