పాక్‌.. భారత్‌ను ఎందుకు విభజించాలనుకుంటున్నావ్‌?: రాజ్‌నాథ్‌ సింగ్‌

ముంబయి: పాకిస్థాన్‌పై భారత రక్షణ శాఖ మంత్రి రాజ్‌నాథ్‌ సింగ్‌ మరోసారి విరుచుకుపడ్డారు. భారత్‌ జోలికి వస్తే ఊరుకునేది లేదని పరోక్షంగా హెచ్చరించారు. శుక్రవారం మహారాష్ట్రలోని ధులే ప్రాంతంలో పర్యటనలో ఆయన పలు అభివృద్ధి పనులను ప్రారంభించారు. పలువురు భారత చక్రవర్తుల విగ్రహాలను ఆవిష్కరించారు. ఈ సందర్భంగా ఆయన మాట్లాడుతూ.. పాకిస్థాన్‌ గురించి ప్రస్తావించారు. భారత్‌ను ఎందుకు అస్థిర పర్చాలని, విభజించాలని చూస్తుందో నేరుగా పాక్‌నే ప్రశ్నిస్తున్నట్లు తెలిపారు. ‘గతంలో ఎయిర్‌స్ట్రైక్‌, సర్జికల్‌ స్ట్రైక్‌ లేవు. కానీ, మేం చేసి చూపించాం. భారత భూభాగంలోనే కాదు.. సరిహద్దు దాటైనా సరే ఉగ్రవాదులను మట్టుబెడతామని పాక్‌కు గట్టి సందేశాన్ని ఇచ్చాం’ అని రాజ్‌నాథ్‌ సింగ్‌ గుర్తుచేశారు.

దేశ రాజకీయ నాయకుల గురించి మాట్లాడుతూ.. నేతల మాటలు, చేతల మధ్య తేడాలు ఉండటంతో ప్రజలు వారిని విశ్వసించడం మానేస్తున్నారని కేంద్ర మంత్రి వ్యాఖ్యానించారు. భాజపా ప్రభుత్వం దీన్ని ఒక సవాలుగా తీసుకుందని, ప్రజలు విశ్వాసం కోల్పోయే పరిస్థితులు రాకుండా చేస్తామని చెప్పారు. తాము ఏం చెబుతామో.. అది చేసి చూపిస్తామని కేంద్రమంత్రి రాజ్‌నాథ్‌ సింగ్‌ పునరుద్ఘాటించారు.

► Read latest National - International News and Telugu News