భాజపాలోకి విశాల్‌..?

క్లారిటీ ఇచ్చిన మేనేజర్‌

చెన్నై: కోలీవుడ్‌ నటుడు విశాల్ పొలిటికల్‌ ఎంట్రీకి సంబంధించి పూర్తి స్పష్టత వచ్చింది. విశాల్‌ త్వరలో రాజకీయాల్లోకి రానున్నారంటూ గత కొన్నిరోజులుగా పలు ప్రసార మాద్యమాల్లో వార్తలు చక్కర్లు కొడుతున్నాయి. అంతేకాకుండా ఆయన త్వరలోనే భాజపా తీర్థం పుచ్చుకోనున్నారంటూ సోషల్‌మీడియాలో పోస్టులు కూడా దర్శనమిస్తున్నాయి. ఈ తరుణంలో విశాల్‌ మేనేజర్‌ హరికృష్ణన్‌ సదరు వార్తలను ఖండించారు. అవన్నీ అవాస్తవాలేనని చెప్పారు. విశాల్‌ రాజకీయాల్లోకి ఎంట్రీ ఇవ్వడం లేదని, కాబట్టి ఎవరూ ఆ వార్తలను నమ్మవద్దని సూచించారు. హరికృష్ణన్ పెట్టిన ట్వీట్‌తో విశాల్‌ ఇప్పట్లో రాజకీయాల్లోకి రావడం లేదని అభిమానులకు స్పష్టత వచ్చింది.

ఇటీవల మహారాష్ట్ర ప్రభుత్వానికి వ్యతిరేకంగా వ్యాఖ్యలు చేసిన కంగన ధైర్యాన్ని ప్రశంసిస్తూ విశాల్‌ ఓ ట్వీట్‌ చేసిన విషయం తెలిసిందే. ‘ప్రభుత్వాలు తప్పులు చేసినప్పుడు తమ గళాన్ని ఎలా వినిపించాలో తెలియజేస్తూ ప్రజలకు ఓ పెద్ద ఉదాహరణగా నిలిచావు. ఇది 1920లలో భగత్‌సింగ్‌ చేసిన పోరాటంలాంటిదే’ అని విశాల్‌ పేర్కొన్నారు. అయితే విశాల్‌ పెట్టిన సదరు ట్వీట్‌.. ఆయన త్వరలోనే రాజకీయాల్లోకి రానున్నారు.. ముఖ్యంగా భాజపా కండువా కప్పుకోనున్నారనే ఊహాగానాలు వచ్చాయి.