Manamey: ఈ వేసవిలో... ‘మనమే’

‘చాలా మంచోడిగా కనిపిస్తా, కానీ మంచోడినా? కాదు’ అని చెప్పుకునే ఓ అబ్బాయి. ‘ఒకరికి మాట ఇస్తే దానికి కట్టుబడి ఉండటమే మన క్యారెక్టర్‌’ అని నమ్మే ఓ అమ్మాయి. భిన్న ధృవాల్లాంటి ఈ ఇద్దరి మధ్యకి ముద్దులొలుకుతున్న ఓ చిన్నారి వచ్చాడు. ఆ తర్వాత ఏం జరిగిందో తెలియాలంటే ‘మనమే’ చూడాల్సిందే. శర్వానంద్‌ కథానాయకుడిగా తెరకెక్కుతున్న చిత్రం ‘మనమే’. కృతిశెట్టి కథానాయిక. మాస్టర్‌ విక్రమాదిత్య కీలక పాత్ర పోషించారు. శ్రీరామ్‌ ఆదిత్య దర్శకత్వం వహిస్తున్నారు. టి.జి.విశ్వప్రసాద్‌ నిర్మాత. ఈ వేసవిలోనే ప్రేక్షకుల ముందుకు రానున్న ఈ సినిమా టీజర్‌ని శుక్రవారం విడుదల చేశారు. ఆహ్లాదాన్ని పంచుతూ, అలరించే ఓ కొత్తతరం  చిత్రమిదని సినీ వర్గాలు తెలిపాయి. ఈ చిత్రానికి సంభాషణలు: అర్జున్‌ కార్తిక్‌, ఠాగూర్‌, వెంకీ, సంగీతం: హేషమ్‌ అబ్దుల్‌ వహాబ్‌, ఛాయాగ్రహణం: విష్ణుశర్మ, జ్ఞానశేఖర్‌.వి.ఎస్‌, కూర్పు: ప్రవీణ్‌పూడి, కళ: జానీ షేక్‌.