Nikhil: ‘కార్తికేయ-2’ 48 గంటల్లో 100 కోట్ల నిమిషాలు చూసేశారు...!

హైదరాబాద్‌: చందు మొండేటి దర్శకత్వంలో నిఖిల్‌ హీరోగా తెరకెక్కిన మిస్టరీ థ్రిల్లర్‌ ‘కార్తికేయ 2’. ‘కార్తికేయ’కు సీక్వెల్‌గా ఈ చిత్రం ప్రేక్షకుల ముందుకు వచ్చింది. చిన్న సినిమాగా ఈ ఏడాది ఆగస్టు 13న విడుదలై అద్భుతమైన విజయాన్ని సొంతం చేసుకుంది. విడుదలైన ప్రతిచోటా భారీ స్థాయిలో వసూళ్లు రాబట్టింది. ఆసక్తి రేకెత్తించే కథాంశం.. కళ్లు చెదిరే విజువల్‌ ఎఫెక్ట్స్‌.. ఉత్కంఠ రేపే సన్నివేశాలు ఉండడంతో మంచి ప్రేక్షకాదరణ పొందింది. ఈ సినిమా ఓటీటీలోకి ఎప్పుడొస్తుందా అని అభిమానులు ఎదురు చూశారు. దసరా సందర్భంగా ఈ చిత్రం జీ5 వేదికగా డిజిటల్ ప్రేక్షకుల ముందుకు వచ్చింది. అక్కడ కూడా ఈ సినిమాకు బ్రహ్మరథం పట్టారు. విడుదలైన 48 గంటల్లోనే అన్ని భాషల్లో కలిపి వంద కోట్ల నిమిషాలు చూసి రికార్డు సృష్టించారు. నిఖిల్‌ సరసన అనుపమ పరమేశ్వరన్‌ నటించిన ఈ సినిమాలో అనుపమ్‌ ఖేర్‌, శ్రీనివాసరెడ్డి, ప్రవీణ్‌, ఆదిత్యా మేనన్‌, తులసి, వైవా హర్ష తదితరులు కీలక పాత్ర పోషించారు.