Raashi Khanna: ‘ది సబర్మతీ రిపోర్ట్‌’ ముగిసింది

గోద్రా రైలు దహనకాండ ఆధారంగా తెరకెక్కుతున్న చిత్రం ‘ది సబర్మతీ రిపోర్ట్‌’. 2002 ఫిబ్రవరి 27న జరిగిన ఈ దుర్ఘటనలో 59మంది ప్రాణాలు కోల్పోయారు. వారికి నివాళులర్పించేందుకు సిద్ధంగా ఉంది ఈ చిత్రబృందం. ‘ట్వెల్త్‌ ఫెయిల్‌’తో విజయాన్ని అందుకున్న బాలీవుడ్‌ కథానాయకుడు విక్రాంత్‌ మాస్సే ఇందులో జర్నలిస్ట్‌ సమర్‌ కుమార్‌ పాత్రలో కనిపించనున్నారు. రాశీ ఖన్నా కీలక పాత్రలో మెరవనుంది. రంజన్‌ చందేల్‌ దర్శకత్వం వహిస్తున్న ఈ సినిమా చిత్రీకరణ పూర్తైనట్లు రాశి తాజాగా సామాజిక మాధ్యమాల వేదికగా తెలిపింది. అందుకు సంబంధించిన ఫొటోలను పంచుకుంది. ‘‘ది సబర్మతీ రిపోర్ట్‌’ షూటింగ్‌ ముగిసింది. దీని కోసం ఎన్నో నిజాలను వెంటాడాము. ఈ చిత్రంతో ప్రాణాలు కోల్పోయిన వారి గొంతుక వినిపించాల్సిన అవసరం ఉంది. ఈ కథను వెండితెరపై చూసేందుకు సిద్ధంగా ఉండండి. అంకితభావం ఉన్న అద్భుతమైన బృందంతో కలిసి పనిచేసినందుకు చాలా ఆనందంగా ఉంది’ అని వ్యాఖ్యల్ని జోడించింది రాశి. ఏక్తా కపూర్‌, శోభా కపూర్‌ నిర్మిస్తున్న ఈ చిత్రం మే 3న విడుదల కానుంది.