Rashmika: అలా చేయడం నేరం..: రష్మిక

ఇంటర్నెట్‌డెస్క్‌: డీప్‌ ఫేక్‌ వీడియో ఘటనలో నిందితుడిని దిల్లీ పోలీసులు అరెస్టు చేయడంపై నటి రష్మిక (Rashmika) హర్షం వ్యక్తం చేశారు. పోలీసులకు ధన్యవాదాలు చెప్పారు. మార్ఫింగ్‌ వీడియోలు, ఫొటోల విషయంలో అప్రమత్తంగా ఉండాలని ఆమె యువతకు పిలుపునిచ్చారు. ‘‘దిల్లీ పోలీసులకు కృతజ్ఞతలు. ప్రేమతో నన్ను ఆదరించి.. అన్నివిధాలుగా అండగా నిలిచేవారు నా చుట్టూ ఉన్నందుకు సంతోషిస్తున్నా. ఇలాంటి ఘటనలకు పాల్పడితే కఠిన చర్యలు తీసుకుంటారని చెప్పడానికి ఇదొక ఉదాహరణ. యువతకు చెప్పేదొక్కటే.. అనుమతి తీసుకోకుండా మీ ఫొటోలను మార్ఫింగ్‌ చేసి ఎక్కడైనా ఉపయోగిస్తే అది నేరం’’ అని ఆమె ఎక్స్‌లో పోస్టు చేశారు.

సోషల్‌ మీడియా తార జారా పటేల్‌ వీడియోకు రష్మిక ముఖాన్ని ఉపయోగించి అసభ్యకర వీడియో సృష్టించిన విషయం తెలిసిందే. అది నెట్టింట వైరల్‌గా మారడంతో సినీ, రాజకీయ ప్రముఖులు ఆగ్రహం వ్యక్తం చేశారు. టెక్నాలజీని చూస్తుంటే భయంగా ఉందంటూ రష్మిక ఆవేదన చెందారు. దిల్లీ మహిళా కమిషన్‌ నుంచి పోలీసులకు నోటీసులు జారీ అయ్యాయి. గతేడాది నవంబరు 10న ఈ ఘటనపై కేసు నమోదు చేసి దర్యాప్తు అనంతరం ఏపీలోని గుంటూరుకు చెందిన ఈమని నవీన్‌ (24)ను అరెస్టు చేశారు. అతడే ఈ వీడియో సృష్టించినట్లు అనుమానాలు ఉన్నాయని దిల్లీ డీసీపీ హేమంత్‌ తివారీ వెల్లడించారు. రష్మిక పేరుతో కొన్నాళ్లు ఫ్యాన్‌ పేజీని నడిపిన నిందితుడు.. ఫాలోవర్ల సంఖ్యను పెంచుకునేందుకే ఈ వీడియో తయారు చేసినట్లు గుర్తించారు.