Rashmika Mandanna: ఆ పాపను ఎలా కలవాలన్న రష్మిక..

ఇంటర్నెట్‌ డెస్క్‌: పాఠశాలలో తన స్నేహితులతో కలిసి ఓ చిన్నారి ‘పుష్ప’ (Pushpa) సినిమాలోని ‘సామీ సామీ’ పాటకు డ్యాన్స్‌ చేసింది. సంబంధిత వీడియో నెట్టింట అందరి దృష్టిని ఆకర్షిస్తోంది. ముద్దులొలికే ఆ పాప నృత్యాన్ని ఎవరో చిత్రీకరించగా, దాన్ని ఓ నెటిజన్‌ ట్విటర్‌లో పోస్ట్‌ చేశాడు. ‘క్యూట్‌’ అంటూ.. ఆ పాటలో నర్తించిన కథానాయిక రష్మికను ట్యాగ్‌ చేశాడు. ఆ వీడియోపై రష్మిక (Rashmika Mandanna) స్పందించింది. తన ఆనందాన్ని వ్యక్తం చేస్తూ ఆ చిన్నారిని కలవాలనుందని, అది ఎలా సాధ్యమవుతుంతో చెప్పమని అభిమానులను కోరింది. రష్మికతోపాటు పలువురు నెటిజన్లు ఆ బాలికను మెచ్చుకుంటున్నారు. ఆ వీడియోను పోస్ట్‌ చేసిన వ్యక్తిని అడిగితే అడ్రస్‌ తెలుస్తుందని కొందరు, ఆ పాప నేపాల్‌కు చెందిందని, వీడియో ఇప్పుడు వైరల్‌ అవుతోందని మరికొందరు రష్మికకు సమాధానమిస్తున్నారు.

అల్లు అర్జున్‌ (Allu Arjun) హీరోగా తెరకెక్కిన ‘పుష్ప: ది రైజ్‌’లోని ఈ ఒక్కపాటే కాదు అన్నీ రికార్డు సృష్టించిన సంగతి తెలిసిందే. తెలుగు, తమిళం, కన్నడ, మలయాళం, హిందీ భాషల్లో గతేడాది విడుదలైన ఈ సినిమా అన్ని చోట్లా వసూళ్ల వర్షం కురిపించింది. ఇటీవల నిర్వహించిన ‘సౌత్‌ ఇండియన్‌ ఇంటర్నేషనల్‌ మూవీ అవార్డ్స్‌(సైమా)’ వేడుకలో ఆరు అవార్డులు దక్కించుకుని, తన హవా చూపించింది. సుకుమార్‌ దర్శకత్వంలో వహించిన ఈ సినిమా రెండో భాగం ‘పుష్ప: ది రూల్‌’ ఇటీవల ప్రారంభమైంది.