PSPKRanaMovie: పవన్‌-రానా చిత్రం.. టైటిల్‌ ఎప్పుడంటే?

ఇంటర్నెట్‌ డెస్క్‌: పవన్‌ కల్యాణ్, రానా కలిసి ఓ చిత్రంలో నటిస్తున్న సంగతి తెలిసిందే. సాగర్‌ కె. చంద్ర దర్శకుడు. త్రివిక్రమ్‌ రచనా సహకారం అందిస్తున్నారు. తాజాగా ఓ క్రేజీ అప్‌డేట్‌ని అభిమానులతో పంచుకుంది చిత్ర బృందం. ఆగస్టు 15న ఉదయం 9:45గంటలకు ఈ చిత్ర టైటిల్‌, పవన్‌ కల్యాణ్‌ పాత్రకి సంబంధించి గ్లింప్స్‌ని విడుదల చేస్తున్నట్టు ప్రకటించింది. ఈ మేరకు ఓ పోస్టర్‌ని విడుదల చేశారు దర్శక-నిర్మాతలు. ఇందులో పవన్‌ కల్యాణ్‌ లుంగీ కట్టులో వెనక్కి తిరిగి కనిపించారు. ప్రీ లుక్‌తోనే ఆసక్తిని పెంచేస్తున్నారు. మరి ఈ సినిమా పేరేంటో తెలియాలంటే కొద్ది రోజులు ఆగాల్సిందే. మలయాళ సూపర్‌ హిట్‌ చిత్రం ‘అయ్యప్పనుమ్‌ కోషియుమ్‌’ రీమేక్‌గా రూపొందుతోంది. పవన్‌ కల్యాణ్‌... భీమ్లానాయక్‌గా కనిపించనున్నారు. ఆయన సరసన నిత్య మేనన్‌ నటిస్తుండగా రానా సరసన ఐశ్వర్య రాజేశ్‌ నటిస్తోంది. ఈ సినిమాను సితార ఎంటర్‌టైన్‌మెంట్స్‌ పతాకంపై సూర్యదేవర నాగ వంశీ నిర్మిస్తున్నారు. తమన్‌ సంగీతం అందిస్తున్నారు.