Tillu Square: నా కొంపెట్లా ముంచనున్నావో చెప్పు రాధికా..

‘డీజే టిల్లు’గా ప్రేక్షకుల్ని కడుపుబ్బా నవ్వించారు సిద్ధు జొన్నలగడ్డ. ఇప్పుడాయన మరోసారి అదే పాత్రలో ‘టిల్లు స్క్వేర్‌’తో వినోదాలు పంచేందుకు సిద్ధమవుతున్నారు. సిద్ధు హీరోగా నటిస్తున్న ఈ చిత్రాన్ని మల్లిక్‌ రామ్‌ తెరకెక్కిస్తున్నారు. సూర్యదేవర నాగవంశీ నిర్మిస్తున్నారు. అనుపమ పరమేశ్వరన్‌ కథానాయిక. సోమవారం ఈ సినిమాలోని రెండో గీతాన్ని విడుదల చేశారు. ‘‘రాధిక.. రాధిక.. ముందుకా.. వెనకకా.. కిందికా.. మీదికా.. ముంచకా.. తేల్చకా ఆటలేందే ఇక’’ అంటూ సాగుతున్న ఈ పాటకు రామ్‌ మిరియాల స్వరాలు సమకూర్చడమే కాక స్వయంగా ఆలపించారు. కాసర్ల శ్యామ్‌ సాహిత్యమందించారు. ‘‘చెప్పు రాధిక ఏం కావాల నీకు.. నేను నీకెలా సహాయపడగలతాను.. ఈ సారి నా కొంప ఎట్లా ముంచబోతున్నావో చెప్పు రాధిక’’ అంటూ పాట ఆరంభంలో అనుపమతో సిద్ధు చెప్పే డైలాగ్‌ వినోదాత్మకంగా ఉంది. ప్రస్తుతం చిత్రీకరణ దశలో ఉన్న ఈ సినిమా వచ్చే ఏడాది ఫిబ్రవరి 9న ప్రేక్షకుల ముందుకు రానుంది. ఈ చిత్రానికి కూర్పు: నవీన్‌ నూలి, ఛాయాగ్రహణం: సాయి ప్రకాశ్‌.