Tulasivanam: మంచి రొమాంటిక్‌ కామెడీ చిత్రం ‘తులసీవనం’

ఈటీవీ విన్‌లో ఈ నెల 21న విడుదల

 దర్శకుడు తరుణ్‌ భాస్కర్‌ సమర్పణలో అక్షయ్‌ లగుసాని, ఐశ్వర్య, వెంకటేశ్‌ కాకమాను, విష్ణు ప్రధాన పాత్రల్లో నటించిన చిత్రం ‘తులసీవనం’. అనిల్‌ రెడ్డి తెరకెక్కించిన ఈ సినిమా ‘ఈటీవీ విన్‌’ ఓటీటీ వేదికగా ఈ నెల 21నుంచి ప్రసారం కానుంది. ఈ నేపథ్యంలోనే శనివారం హైదరాబాద్‌లో ట్రైలర్‌ విడుదల చేశారు. ఈ సందర్భంగా దర్శకుడు, ఈ చిత్ర సమర్పకుడు తరుణ్‌ భాస్కర్‌ మాట్లాడుతూ.. ‘‘చాలా మంది ఫిల్మ్‌ మేకర్స్‌కు సొంత గొంతుక చెప్పాలనే తాపత్రయం ఉన్నప్పటికీ మార్కెట్‌ దృష్ట్యా కొన్ని భయాలు ఉంటాయి. ఇలాంటి ప్రాజెక్ట్స్‌ చేయడం వెనుక అందరి కృషి ఉంటుంది. ఈ ‘తులసీవనం’ కథలో చాలా స్పష్టత ఉంది. అనిల్‌ దీన్ని నిజాయతీగా తీయడం ఒకెత్తైతే దాన్ని ఈటీవీ విన్‌ ప్రోత్సహించడం మరో గొప్ప విషయం. వేరే భాషల నుంచి సినిమాలు వస్తున్నప్పుడు తెలుగులోనూ టికెట్లు తెగుతున్నాయి. కథలు బాగా చెప్తున్నారనే బ్రాండ్‌ ఆ పరిశ్రమలకు క్రియేట్‌ అయింది. తెలుగులో దాన్ని మరోస్థాయికి తీసుకెళ్లాలనేది నా కోరిక. ఇందులో ఈటీవీ విన్‌ ప్రధాన భూమిక పోషిస్తుందని ఆశిస్తున్నా. దీనికోసమే ఈ చిత్రాన్ని తప్పకుండా చూడండి. కచ్చితంగా ఎంజాయ్‌ చేస్తారు’’ అన్నారు. ‘‘ఇదొక మంచి రొమాంటిక్‌ కామెడీ చిత్రం. అందరూ రిలేట్‌ చేసుకునే కథగా ఉంటుంది. స్మరన్‌ అద్భుతమైన సంగీతంతో ఈ చిత్రాన్ని మరోస్థాయికి తీసుకెళ్లాడు. ప్రేమ్‌ సాగర్‌ చక్కటి విజువల్స్‌ ఇచ్చారు. ఈ చిత్రాన్ని తప్పకుండా చూడండి. అందరికీ నచ్చుతుంది’’ అన్నారు దర్శకుడు అనిల్‌ రెడ్డి. ఈ కార్యక్రమంలో నితిన్‌ చక్రవర్తి, అక్షయ్‌ తదితరులు పాల్గొన్నారు.