JanaGanaMana: ‘జనగణమన’.. ఆరంభం

విజయ్‌ దేవరకొండ - పూరి జగన్నాథ్‌ కాంబినేషన్‌లో ‘లైగర్‌’ తెరకెక్కిన సంగతి తెలిసిందే. ప్రస్తుతం నిర్మాణాంతర పనుల్లో ఉన్న ఈ సినిమా.. ఆగస్ట్‌ 25న ప్రేక్షకుల ముందుకు రానుంది. కాగా, ఇప్పుడీ కలయికలోనే ‘జేజీఎం (జనగణమన)’ అనే మరో పాన్‌ ఇండియా సినిమా పట్టాలెక్కబోతోంది. దీన్ని ఛార్మి కౌర్‌, వంశీ పైడిపల్లి సంయుక్తంగా నిర్మిస్తున్నారు. విజయ్‌కు జోడీగా పూజా హెగ్డే నటిస్తోంది. ఈ చిత్ర తొలి షెడ్యూల్‌ శనివారం ముంబయిలో ప్రారంభమైంది. ఈ విషయాన్ని చిత్ర బృందం అధికారికంగా ప్రకటించింది. ఈ సందర్భంగా ఓ ఫొటోతో పాటు చిన్న వీడియోను నెట్టింట పంచుకున్నారు. ‘‘పూరి జగన్నాథ్‌ కలల సినిమా ఇది. హై ఓల్టేజ్‌ యాక్షన్‌ ఎంటర్‌టైనర్‌గా రూపొందుతోంది. ముంబయితో పాటు విదేశాల్లోనూ చిత్రీకరణ జరుపుకోనుంది’’ అని చిత్ర వర్గాలు తెలిపాయి. ఈ సినిమా వచ్చే ఏడాది ఆగస్ట్‌ 3న ప్రేక్షకుల ముందుకు రానుంది. విజయ్‌ ప్రస్తుతం శివ నిర్వాణ దర్శకత్వంలో ‘ఖుషి’లో నటిస్తున్నారు.