Asian Games: 2022 ఆసియా క్రీడలు వాయిదా.. కొవిడ్‌-19 కారణమా?

(Photo: Olympic Council of Asia Twitter)

ఇంటర్నెట్‌డెస్క్‌: ఈ ఏడాది సెప్టెంబర్‌లో చైనాలోని హాంగ్‌జావ్‌ నగరంలో నిర్వహించాల్సిన 2022 ఆసియా గేమ్స్‌ను వాయిదా వేస్తున్నట్లు కొద్దిసేపటి క్రితం నిర్వాహకులు ప్రకటించారు. అయితే, అందుకు గల కారణాలను వెల్లడించలేదు. ప్రస్తుతం చైనాలో కరోనా కేసులు పెరుగుతుండటమే అందుకు కారణంగా తెలుస్తోంది. దీనిపై అధికారిక సమాచారం రావాల్సి ఉంది. సెప్టెంబర్‌ 10 నుంచి 25 తేదీల మధ్య జరగాల్సిన ఈ గేమ్స్‌ను రీషెడ్యూల్‌ చేసే తేదీలను తర్వాత వెల్లడిస్తామని పేర్కొన్నారు. కాగా, ఈ గేమ్స్‌ నిర్వహించాల్సిన హాంగ్‌జావ్‌ ప్రాంతం అక్కడి ప్రధాన నగరమైన షాంఘైకు సమీపంలో ఉంటుంది. ప్రస్తుతం అక్కడ కొవిడ్‌ కేసులు ఎక్కువగా నమోదవుతుండటంతో లాక్‌డౌన్‌ అమలుచేస్తున్నారు. ఈ నేపథ్యంలోనే ఆసియా గేమ్స్‌ను వాయిదా వేయడం ప్రాధాన్యత సంతరించుకుంది. మరోవైపు ఈ గేమ్స్‌ నిర్వహణ కోసం హాంగ్‌జావ్‌లో 56 వేదికలను రూపొందించినట్లు నిర్వాహకులు గతనెలలోనే వెల్లడించడం గమనార్హం.