సెమీస్‌లో సింధు

స్పెయిన్‌ మాస్టర్స్‌

మాడ్రిడ్‌: స్పెయిన్‌ మాస్టర్స్‌ బ్యాడ్మింటన్‌ టోర్నీలో భారత స్టార్‌ షట్లర్‌ పీవీ సింధు సెమీస్‌కు దూసుకెళ్లింది. ఈ ఏడాది వరుస పరాభవాల నుంచి బయటపడుతూ.. తొలిసారి ఓ టోర్నీ సెమీస్‌లో అడుగుపెట్టింది. శుక్రవారం మహిళల సింగిల్స్‌ క్వార్టర్స్‌లో రెండో సీడ్‌ సింధు 21-14, 21-17 తేడాతో మియా బ్లిచ్‌ఫెల్ట్‌ (డెన్మార్క్‌)పై విజయం సాధించింది. వరుస వైఫల్యాలతో సతమతమై.. ప్రపంచ ర్యాంకింగ్స్‌లో టాప్‌-10లో చోటు కోల్పోయిన సింధు ఈ మ్యాచ్‌లో పోరాట పటిమ ప్రదర్శించింది. మియాతో పోరులో వెనుకబడ్డా తిరిగి పుంజుకుంది. తనదైన శైలిలో స్మాష్‌లు, క్రాస్‌కోర్టు షాట్లతో చెలరేగి వరుస గేమ్‌ల్లో ప్రత్యర్థిని ఓడించింది. తొలి గేమ్‌లో 4-6తో వెనుకబడ్డ సింధు పుంజుకుంది. 6-6తో ప్రత్యర్థిని అందుకుంది. అక్కడి నుంచి ఆధిక్యం చేతులు మారుతూ సాగింది. 15-14తో నిలిచిన సింధు.. వరుసగా ఆరు పాయింట్లు నెగ్గి తొలి గేమ్‌ సొంతం చేసుకుంది. రెండో గేమ్‌లోనూ ఓ దశలో 6-12తో వెనుకబడ్డ ఆమె పట్టు వదల్లేదు. 16-16తో ప్రత్యర్థి స్కోరును సమం చేయడమే కాకుండా.. అదే జోరు కొనసాగించి గేమ్‌తో పాటు మ్యాచ్‌ కైవసం చేసుకుంది. మరోవైపు పురుషుల సింగిల్స్‌లో భారత పోరాటం ముగిసింది. క్వార్టర్స్‌లో అయిదో సీడ్‌ శ్రీకాంత్‌ 18-21, 15-21తో టాప్‌సీడ్‌ కెంటా నిషిమోటో (జపాన్‌) చేతిలో ఓడాడు.