లంక ఖాతాలో రెండో వన్డే

హంబన్‌టోట: అఫ్గానిస్థాన్‌తో మూడు వన్డేల సిరీస్‌లో తొలి మ్యాచ్‌ను కోల్పోయిన ఆతిథ్య శ్రీలంక.. రెండో వన్డేలో సత్తా చాటింది. ఆల్‌రౌండ్‌ ప్రదర్శనతో 132 పరుగుల తేడాతో ప్రత్యర్థిని ఓడించి సిరీస్‌ను 1-1తో సమం చేసింది. మొదట లంక 50 ఓవర్లలో 6 వికెట్లకు 323 పరుగులు సాధించింది. కుశాల్‌ మెండిస్‌ (78; 75 బంతుల్లో 7×4, 1×6) దిముత్‌ కరుణరత్నే (52) అర్ధసెంచరీలతో మెరిశారు. నిశాంక (43), సమరవిక్రమ (44), ధనంజయ డిసిల్వా (29 నాటౌట్‌), హసరంగ (29 నాటౌట్‌) కూడా తలో చేయి వేసి స్కోరును 300 దాటించారు. ఛేదనలో హసరంగ (3/42), ధనంజయ డిసిల్వా (3/39), చమీర (2/18)ల ధాటికి అఫ్గాన్‌ 42.1 ఓవర్లలో 191 పరుగులకే ఆలౌటైంది. 32 ఓవర్లకు 152/3తో మెరుగ్గానే కనిపించిన అఫ్గాన్‌.. ఆ తర్వాత లంక స్పిన్నర్ల ధాటికి 39 పరుగుల తేడాతో 7 వికెట్లు కోల్పోయి ఓటమి చవిచూసింది. కెప్టెన్‌ హస్మతుల్లా (57; 62 బంతుల్లో 6×4), ఇబ్రహీం జద్రాన్‌ (54; 75 బంతుల్లో 2×4, 2×6), రహ్మత్‌ షా (36; 42 బంతుల్లో 3×4)ల పోరాటం సరిపోలేదు.