T20 World Cup: ఫైనల్ చేరేది పాకిస్థానే.! : రాబిన్‌ ఉతప్ప

ఇంటర్నెట్‌ డెస్క్: టీ20 ప్రపంచకప్‌ తుది దశకు చేరుకొంది. బుధవారం జరిగిన మ్యాచ్‌లో ఇంగ్లాండ్‌ను ఓడించిన న్యూజిలాండ్‌ జట్టు ఇప్పటికే ఫైనల్‌కు చేరుకొంది. మరో స్థానం కోసం ఆస్ట్రేలియా, పాకిస్థాన్ జట్లు గురువారం దుబాయ్ వేదికగా తలపడనున్నాయి. ఈ నేపథ్యంలో టీమిండియా సీనియర్‌ బ్యాటర్‌ రాబిన్‌ ఉతప్ప పాకిస్థాన్ జట్టు ఫైనల్‌ చేరుతుందని జోస్యం చెప్పాడు. ప్రస్తుత ప్రపంచకప్‌లో రెండు జట్లు బాగా ఆడుతున్నాయని.. అయితే, పాక్‌ ఆడిన అన్ని మ్యాచ్‌ల్లో గెలిచి ముందుకుసాగుతోందని.. అందుకే ఆ జట్టు ఫేవరెట్‌గా బరిలోకి దిగుతోందని పేర్కొన్నాడు.

‘ఆస్ట్రేలియా, పాకిస్థాన్‌ జట్ల మధ్య జరుగునున్న రెండో సెమీఫైనల్‌లో పాక్‌ ఫేవరెట్‌గా బరిలోకి దిగుతోంది. ప్రస్తుత టీ20 ప్రపంచకప్‌లో ఆ ఒక్క జట్టే అజేయంగా కొనసాగుతోంది. అది పాక్‌కు కలిసొస్తుందో లేదో తెలియదు. కానీ, అదే జోరుని కొనసాగిస్తే మాత్రం విజయం సాధించడం పెద్ద కష్టమేమీ కాదు. మరో వైపు ఆస్ట్రేలియా కూడా మెరుగ్గా రాణిస్తోంది. వాళ్లను తక్కువ అంచనా వేయడానికి వీల్లేదు. తమదైన రోజున ఎంతటి బలమైన జట్టునైనా ఓడించగలదు. ప్రత్యేకించి ఐసీసీ టోర్నీల్లో ఆ జట్టుకు గొప్ప రికార్డుంది. ఆసీస్ ఓపెనర్లు మంచి ఫామ్‌లో ఉన్నారు. బౌలింగ్ విభాగం కూడా బలంగా కనిపిస్తోంది’ అని రాబిన్ పేర్కొన్నాడు. 

టీ20 ప్రపంచకప్‌లో రెండుసార్లు ఫైనల్స్‌కు చేరిన పాకిస్థాన్‌ జట్టు 2009తో ఛాంపియన్‌గా నిలిచింది. మరోవైపు, ఐదు సార్లు వన్డే ప్రపంచకప్‌ విజేతగా నిలిచిన ఆస్ట్రేలియా.. ఇప్పటి వరకు ఒక్కసారి కూడా పొట్టి ఫార్మాట్లో విశ్వవిజేతగా నిలువలేకపోయింది. అందుకే, ఈ సారి ఎలాగైనా కప్‌ను గెలవాలనే కసితో బరిలోకి దిగుతోంది.