Shoaib akthar: అస్వస్థతతో ఉంటేనే ఇలా ఆడారు.. ఫిట్‌గా ఉంటే ఏం చేసేవారో: షోయబ్ అక్తర్

రావల్పిండి: పాకిస్థాన్‌, ఇంగ్లాండ్‌ మధ్య జరిగిన తొలి టెస్టు మ్యాచ్‌ రికార్డులకు నెలవైంది. ఆస్ట్రేలియా, దక్షిణాఫ్రికా రికార్డులను చెరిపేస్తూ తొలి రోజు టెస్టులో అత్యధిక పరుగులు సాధించిన ఘనతను ఇంగ్లాండ్‌ సాధించింది. అయితే, ఈ మ్యాచ్‌ ముంగిట ఇంగ్లిష్‌ ఆటగాళ్లు అస్వస్థతకు గురైన విషయం తెలిసిందే. కానీ, ఆ ప్రభావమేమీ వారి ఆటలో కనపడలేదు. గురువారం పాక్‌ ఆటగాళ్లపై విరుచుకుపడుతూ శతకాలు రాబట్టారు. తొలిరోజే అత్యధికంగా 506 పరుగులు సాధించారు. ఈ నేపథ్యంలో పాక్‌ మాజీ పేసర్‌  షోయబ్‌ అక్తర్‌ స్పందించాడు. ఇంగ్లాండ్‌ జట్టు అస్వస్థతకు గురైనప్పుడే ఇలా ఆడితే.. వారు బాగుంటే పరిస్థితి ఏమయ్యేదో అంటూ ట్వీట్‌ చేశాడు. 

‘‘ఇంగ్లాండ్‌ ఆటగాళ్లకు ఆరోగ్యం బాగాలేదా? అస్వస్థతతో ఉంటే ఇలా ఎవరైనా ఆడతారా? ఒకవేళ వారు పూర్తి ఫిట్‌గా ఉంటే పరిస్థితి ఎలా ఉండేదో. ఇందులో మా కుర్రాళ్లను తప్పుపట్టడానికి ఏమీలేదు. ఎందుకంటే వారు టీ20 ఫాస్ట్‌ బౌలర్లు. టెస్టుల్లో వారింకా కుదురుకోవలసి ఉంది’’ అంటూ షోయబ్‌ వ్యాఖ్యానించాడు. గురువారం జరిగిన మ్యాచ్‌లో ఆరంభంలోనే 73 బౌండరీలు, మూడు సిక్సులతో ఇంగ్లాండ్‌ బ్యాటర్లు చెలరేగారు. టెస్టు సిరీస్‌లో వరుసగా 6 బౌండరీలు చేసిన ఆటగాడిగా బ్రూక్‌ నిలిచాడు.