అన్నంలో పురుగులు.. విద్యార్థుల తల్లిదండ్రుల ఆందోళన

చిగురుమామిడి, న్యూస్‌టుడే: తమ పిల్లలు తినే మధ్యాహ్న భోజనంలో తెల్ల పురుగులు వస్తున్నాయంటూ కరీంనగర్‌ జిల్లా చిగురుమామిడి మండలం చిన ముల్కనూర్‌ మోడల్‌ స్కూల్‌ విద్యార్థుల తల్లిదండ్రులు రోడ్డుపై బైఠాయించి ఆందోళనకు దిగారు. శుక్రవారం పేరెంట్స్‌ కమిటీ సమావేశం ఏర్పాటు చేయగా.. అన్నంలో పురుగులు, నీళ్ల చారు వల్ల చాలా మంది విద్యార్థులు మధ్యాహ్న భోజనం చేయడం లేదని కొందరు తల్లిదండ్రులు ప్రిన్సిపల్‌ శ్రీనివాస్‌ దృష్టికి తీసుకెళ్లారు. తిన్నవారు కూడా అనారోగ్యానికి గురవుతున్నారని పేర్కొన్నారు. ఇలాంటి బియ్యాన్ని ఎందుకు వండుతున్నారని వంట మనుషులను నిలదీశారు. ముఖ్యమంత్రి దత్తత గ్రామంలో ఇలా జరగడమేంటని ప్రశ్నించారు. తహసీల్దార్‌, మండల పరిషత్‌ సూపరింటెండెంట్‌, ఎంఈవోలు అక్కడికి చేరుకొని.. నాణ్యమైన బియ్యం సరఫరా చేయిస్తామని హామీ ఇచ్చారు.