Telangana News: రంగులు మార్చే రాశిగుట్ట రహస్యం ఇదే!

వీర్నపల్లి, న్యూస్‌టుడే: రాజన్న సిరిసిల్ల జిల్లా ఎల్లారెడ్డిపేట, వీర్నపల్లి మండలాల సరిహద్దులోని రాశిగుట్టకు ఓ ప్రత్యేకత ఉంది. దట్టమైన అటవీ ప్రాంతంలోని ఈ గుట్టపైకి చేరుకోగానే శరీరం రంగులు మారుతుందని స్థానికులు నమ్ముతారు. ఈ గుట్టపై ఆంజనేయస్వామి ఆలయం సైతం ఉంది. చరిత్ర పరిశోధకుడు రెడ్డి రత్నాకర్‌రెడ్డి మంగళవారం ఈ ఆలయాన్ని సందర్శించారు. ఈ గుట్టపైకి చేరుకోగానే శరీరంలో రంగుల మార్పుపై పరిశోధించారు. ఆ వివరాలను వెల్లడించారు.

‘‘రాశిగుట్ట పైభాగాన లేటరైట్‌ శిలలు ఉన్నాయి. అధిక ఉష్ణోగ్రతలు, వర్షపాతం కారణంగా లేటరైట్‌ క్యాపింగ్‌ ఏర్పడుతుంది. వర్షాలకు పైనుంచి కొట్టుకు వచ్చిన చిన్నచిన్న లేటరైట్‌ శిలల కారణంగా నిటారుగా ఉన్న పర్వతాన్ని చెప్పులతో ఎక్కేందుకు వీలుపడదు. ఈ రాళ్లు.. నీరు, గాలి, వాతావరణానికి ఆక్సీకరణం చెంది మెత్తగా మారడంతో పాటు జాజు, పసుపు, నారింజ రంగులను సంతరించుకుంటాయి. గుట్టపైకి ఎక్కే వారిపై ఈ రంగులోని ధూళి పడటంతో చేతులు, కాళ్లు మాత్రమే పసుపు రంగులో కనిపిస్తాయి. శరీర వర్ణంలో ఎలాంటి మార్పు ఉండదు’’ అని వివరించారు. రాష్ట్ర ప్రభుత్వం పర్యాటక ప్రాంతంగా అభివృద్ధి చేసి, గుట్టపైకి చేరుకునేలా గుర్తులు ఏర్పాటు చేయించాలని కోరారు.