‘మద్యం మత్తులో ఎస్సై’.. ఉన్నతాధికారుల ఆగ్రహం

 రాజాపూర్‌ ఎస్సైపై సస్పెన్షన్‌ వేటు

జడ్చర్ల గ్రామీణం, రాజాపూర్‌: మద్యం మత్తులో ఓ ఎస్సై తన ఇంటికి బదులు ఇతరుల ఇంటికి వెళ్లిన ఘటన కలకలం రేపడంతో పోలీసు శాఖ ఉన్నతాధికారులు తీవ్రంగా స్పందించారు. మహబూబ్‌నగర్‌ జిల్లా రాజాపూర్‌ ఎస్సై శ్రీనివాస్‌పై సస్పెన్షన్‌ వేటు వేసినట్లు జిల్లా ఎస్పీ వెంకటేశ్వర్లు గురువారం ప్రకటించారు. మంగళవారం రాత్రి ఓ గ్రామంలో జరిగిన శుభకార్యంలో పాల్గొన్న ఎస్సై శ్రీనివాస్‌ మిత్రులతో కలిసి మద్యం తాగారు. జడ్చర్లలో తాను అద్దెకు ఉంటున్న ఇంటికి బుధవారం తెల్లవారుజామున మద్యం మత్తులోనే బయలుదేరారు. ఈ క్రమంలో తన ఇంటికి బదులుగా మరో ఇంటికి వెళ్లి తలుపు తట్టడంతో స్థానికులు ఆయన్ను చితకబాది చెట్టుకు కట్టేశారు. ఈ విషయం పత్రికల్లో రావడంతో శ్రీనివాస్‌ను జిల్లా ఎస్పీ తన కార్యాలయానికి పిలిపించి వివరాలు ఆరాతీశారు. అనంతరం ఉన్నతాధికారుల ఆదేశాల మేరకు శ్రీనివాస్‌పై సస్పెన్షన్‌ వేటు వేశారు.