గవర్నర్‌ వద్ద బిల్లుల పెండింగ్‌ కేసులో కేంద్రానికి సుప్రీం నోటీసులు

ఈనాడు, దిల్లీ: శాసనసభ పాస్‌ చేసిన బిల్లులకు ఆమోదం తెలపకుండా గవర్నర్‌ పెండింగ్‌లో పెట్టడాన్ని సవాల్‌చేస్తూ తెలంగాణ ప్రభుత్వం దాఖలు చేసిన కేసులో సుప్రీంకోర్టు కేంద్ర ప్రభుత్వానికి నోటీసులు జారీచేసింది. సోమవారం ఈ కేసుపై ప్రధాన న్యాయమూర్తి జస్టిస్‌ డి.వె.ౖచంద్రచూడ్‌, జస్టిస్‌ పి.శ్రీనరసింహ, జస్టిస్‌ జె.బి.పర్డీవాలాతో కూడిన ధర్మాసనం విచారణ చేపట్టింది. కేంద్ర ప్రభుత్వానికి నోటీసులు జారీ చేయడానికి ఉపక్రమించగా సొలిసిటర్‌ జనరల్‌ తుషార్‌ మెహతా ఆ అవసరం లేదని, తాను విషయాన్ని తెలుసుకొని చెబుతానని సీజేఐకి విన్నవించారు. తాను ఇక్కడే ఉన్నందున ప్రత్యేకంగా కేంద్రానికి నోటీసులు జారీ చేయాల్సిన అవసరం లేదన్నారు. అయితే మంగళవారం వెలువడిన ధర్మాసనం లిఖితపూర్వక ఉత్తర్వుల్లో కేంద్రానికి నోటీసులు జారీ చేసినట్లు పేర్కొంది.