Biryani - Swiggy: బిర్యానీకే జై!

రంజాన్‌ నెలలోనూ 10 లక్షల ఆర్డర్లు
హలీంను కోరింది 4 లక్షల మంది

ఈనాడు, హైదరాబాద్‌: అందుబాటులో ఎన్ని రుచులున్నా ఆహా అనిపించేది బిర్యానీయే అంటారు ఆహారప్రియులు. సాధారణంగా రంజాన్‌ మాసంలో హలీంను ఎక్కువ మంది ఆస్వాదిస్తుంటారు. ఈ రుచుల కోసం జిల్లాలు, ఇతర నగరాల నుంచి హైదరాబాద్‌కు వస్తుంటారు. ఈ నేపథ్యంలో రంజాన్‌ సీజన్‌లో బిర్యానీ విక్రయాలు తగ్గుతుంటాయి. ఆ ఆనవాయితీని ఈ దఫా పటాపంచలు చేశారు భాగ్యనగర వాసులు. పండగ ఏదైనా, ఏ కాలంలోనైనా బిర్యానీకే జైకొడతామని నిరూపించారు. స్విగ్గీ సంస్థకు రంజాన్‌ నెలలో వచ్చిన ఆర్డర్లే అందుకు నిదర్శనం. ‘ఈ నెలలో సుమారు 10 లక్షల బిర్యానీలను నగరవాసులు ఆన్‌లైన్‌లో ఆర్డర్‌ ఇచ్చారు. గత ఏడాది కంటే ఇది 20 శాతం అధికం’ అని ఆ సంస్థ తాజాగా వెల్లడించింది. హలీంకు నెల రోజుల్లో 4 లక్షల ఆర్డర్లు వచ్చినట్టు పేర్కొంది.

గతంలో హలీంలో ఒకట్రెండు రుచులు మాత్రమే ఉండేవి. ఈ సీజన్‌లో మటన్‌, చికెన్‌, ఫిష్‌తోపాటు పర్షియన్‌ స్పెషల్‌, పాలమూరు పొట్టేలు, డ్రైఫూట్‌ తదితర తొమ్మిది రకాలను చెఫ్‌లు అందుబాటులోకి తీసుకొచ్చారని, వచ్చిన ఆర్డర్లను బట్టిచూస్తే అన్ని రకాల రుచులను నగర వాసులు ఇష్టపడుతున్నట్టు తేలిందని ఆ సంస్థ పేర్కొంది. శుక్రవారంతో రంజాన్‌ నెల ముగుస్తుండటంతో ఆఖరి రోజు హలీం కేంద్రాల ముందు ఆహారప్రియులు బారులుదీరారు.