పెద్దపులి సంచారంతో వట్వర్లపల్లిలో భయాందోళన

అమ్రాబాద్‌, న్యూస్‌టుడే: నాగర్‌కర్నూల్‌ జిల్లా అమ్రాబాద్‌ మండలంలోని వట్వర్లపల్లి సమీపంలో పెద్దపులి సంచారం కలకలం రేపింది. సమీప రైతులు, గ్రామస్థులు భయాందోళనకు గురవుతున్నారు. గ్రామానికి చెందిన రైతులు మంగళవారం ఉదయం పొలం పనులు చేస్తుండగా అడవి వైపు నుంచి ఓ పులి రావటాన్ని గమనించి గట్టిగా అరవడంతో కానుగులబావి చెరువుకట్ట వైపు పారిపోయింది. వెంటనే అడవిలో మేతకు వెళ్లిన తమ పశువులను వెతికి గ్రామానికి తరలించారు. మూడ్రోజులుగా గ్రామ పరిసరాల్లో పులి సంచరిస్తోందని, గ్రామానికి చెందిన ఓ పశువుపై దాడి చేసి చంపిందని గ్రామస్థులు తెలిపారు. వట్వర్లపల్లి పరిసరాల్లో సంచరిస్తున్న పెద్దపులిని ‘ఎం-22 సీజర్‌’గా గుర్తించామని దోమలపెంట రేంజ్‌ అధికారి ఆదిత్య తెలిపారు. దీనికి వయసు పైబడిందన్నారు. గ్రామస్థులెవరూ అడవి వైపు వెళ్లొద్దని హెచ్చరించారు.