రేసర్‌లా బైక్‌లు, కార్లు నడుపుతున్న మూడేళ్ల చిన్నోడు

మూడేళ్ల చిన్నోడు బైక్‌లు, సూపర్‌ కార్లను నడిపేస్తున్నాడు. యాక్సిలరేటర్‌ అందకపోయినా.. ముందు ఏముందో సరిగ్గా కనపడకపోయినా రేసర్‌లా దూసుకుపోతున్నాడు. తుర్కియేకు చెందిన కెనాన్‌ సోఫౌగ్లు ఓ మోటార్‌ సైకిల్‌ రేసర్‌. అతడి చిన్న కుమారుడే ఈ పిల్లాడు. అతడి పేరు జైన్‌ సోఫౌగ్లు. జైన్‌ చిన్ననాటి నుంచి మోటార్‌ సైకిళ్లు, సూపర్‌ కార్లతోనే ఎక్కువగా గడిపేవాడు. ఇంకా చెప్పాలంటే ఈ బాలుడు కొందరు పెద్దవాళ్లకంటే కూడా అద్భుతంగా కార్లను నడపగలడు. జైన్‌ సోఫౌగ్లుకు ఇన్‌స్టాగ్రామ్‌లో సుమారు 10లక్షల మంది ఫాలోవర్లు ఉన్నారు. మూడేళ్ల పిల్లాడు కలలో కూడా ఊహించని అనేక విన్యాసాలను చేస్తున్నాడు. ఎంతో ఇరుకైన ఓ గ్యారేజీలో కారును అద్భుతంగా పార్క్‌ చేశాడు. దీనికి సంబంధించిన వీడియోను ఇటీవలే అతడి తల్లిదండ్రులు ఇన్‌స్టాగ్రామ్‌లో పోస్ట్‌ చేశారు. సాధారణ కార్లే కాకుండా సూపర్‌ కార్లను సైతం అద్భుతంగా నడుపుతాడు జైన్‌. ముందు వెళ్లే వాహనాలు కనపడేలా కారులో ఓ ట్యాబ్‌ను ఏర్పాటు చేశారు అతడి తల్లిదండ్రులు. కారు ముందున్న దృశ్యాలను ఆ ట్యాబ్‌లో చూస్తూ.. కాళ్లు అందకున్నా పెడల్‌ కోసం కష్టపడుతూనే సూపర్‌గా డ్రైవ్‌ చేస్తున్నాడు జైన్‌. తుర్కియే పార్లమెంట్‌ సభ్యుడైన జైన్‌ తండ్రి కెనాన్‌.. చట్టబద్ధమైన వయసు లేకుండా కుమారుడితో కారు నడిపిస్తున్నారని తీవ్ర వివాదంలో చిక్కుకున్నారు.