హర్మోజ్‌ జలసంధిలో వాణిజ్య నౌకను వేధించిన ఇరాన్‌ సైన్యం: అమెరికా

దుబాయ్‌: హర్మోజ్‌ జలసంధిలో ఇరాన్‌కు చెందిన రివల్యూషనరీ గార్డ్‌ (సైన్యం) ఓ నౌకను వేధింపులకు గురిచేసిన సందర్భంగా దానికి తమ దేశ నావికులు, బ్రిటన్‌కు చెందిన రాయల్‌ నేవీ సహాయం చేసినట్లు అమెరికా నౌకా దళం సోమవారం వెల్లడించింది. ఆదివారం మధ్యాహ్నం ఓ వాణిజ్య నౌకను ఇరాన్‌కు చెందిన సాయుధులు గల మూడు చిన్న నౌకలు చుట్టుముట్టాయని తెలిపింది. ఈ ఘటనకు సంబంధించిన ఛాయా చిత్రాలను బయటపెట్టింది. అమెరికా నౌకా దళానికి చెందిన గైడెడ్‌ మిస్సైల్‌ డిస్ట్రాయర్‌ యూఎస్‌ఎస్‌ మెక్‌ఫౌల్‌, బ్రిటన్‌ రాయల్‌ నేవీకి చెందిన హెచ్‌ఎంఎస్‌ లాంకెస్టర్‌ తక్షణం స్పందించాయని వివరించింది. దీంతో ఇరాన్‌ చిన్న నౌకలు అక్కడ నుంచి వెళ్లిపోయాయని ఆపై ఆ వాణిజ్య నౌక హర్మోజ్‌ జలసంధిలో ఎటువంటి అడ్డంకులు లేకుండా ముందుకు సాగిపోయిందని అమెరికా నౌకాదళం వెల్లడించింది.