ట్రంప్‌ మానసికస్థితి సరిగా లేదు

నిక్కీ హేలీ విమర్శలు

వాషింగ్టన్‌: అమెరికా అధ్యక్ష ఎన్నికల్లో రిపబ్లికన్‌ పార్టీ తరఫున అభ్యర్థిత్వం కోసం పోటీపడుతున్న భారతీయ అమెరికన్‌ నిక్కీ హేలీ.. మాజీ అధ్యక్షుడు డొనాల్డ్‌ ట్రంప్‌పై ఎదురు దాడికి దిగారు. ఆయన మానసిక పరిస్థితి సరిగా లేదని, వయో భారంతో అధ్యక్ష బాధ్యతలను నిర్వహించలేరని విమర్శించారు. శనివారం ఎన్నికల ప్రచారంలో తనపై పరుష వ్యాఖ్యలు చేసిన ట్రంప్‌పై ఆమె ఈ మేరకు స్పందించారు. ‘‘గత రాత్రి ఎన్నికల ర్యాలీలో ట్రంప్‌ నా పేరును పదేపదే ప్రస్తావించారు. 2021 జనవరి 6న క్యాపిటల్‌ భవనంపై దాడి సమయంలో నేను సరైన భద్రతా చర్యలు తీసుకోలేదని ఆరోపించారు. నాడు నేను ఆ భవన భద్రతకు బాధ్యురాలిగా ఉన్నానని ఆయన భావిస్తున్నారు. నన్ను నాన్సీగా పొరబడ్డారు. వాస్తవానికి 2021 జనవరి 6న నేను వాషింగ్టన్‌ డీసీలో లేను. దేశం, ప్రపంచంలో పరిస్థితులు అస్తవ్యస్తంగా ఉన్నప్పుడు 80 ఏళ్ల నిండిన వ్యక్తులు (బైడెన్‌, ట్రంప్‌ను ఉద్దేశించి) అధ్యక్షులుగా మనకు అవసరమా?’’ అని నిక్కీ ప్రశ్నించారు. తనకు తల్లిదండ్రులు మొదటపెట్టిన ‘నమ్రత’ను నింబ్రతగా ట్రంప్‌ ఉచ్ఛరించడాన్ని, తద్వారా తన భారతీయ మూలాలను తెరపైకి తీసుకురావడాన్ని కూడా ఆమె ప్రస్తావించారు. ‘‘ట్రంప్‌ గురించి నాకు బాగా తెలుసు. ఆయన అభద్రతాభావానికి గురైనప్పుడే ఇలాంటి వ్యాఖ్యలు చేస్తారు’’ అని నిక్కీ విమర్శించారు.

ఆయనకు ప్రపంచంలోని (చైనా, రష్యా, ఉత్తర కొరియా అధ్యక్షుల పేర్లు పరోక్షంగా ప్రస్తావిస్తూ) నియంతలతో సన్నిహిత సంబంధాలు ఉన్నాయని ఆరోపించారు. రిపబ్లికన్‌ పార్టీలో అధ్యక్ష అభ్యర్థిత్వం కోసం జరుగుతున్న అంతర్గత ఎన్నికల్లో ట్రంప్‌ ముందంజలో ఉన్నారు. తర్వాతి స్థానంలో నిక్కీ కొనసాగుతున్నారు. తాజా సర్వేల ప్రకారం వీరిద్దరి మధ్య వ్యత్యాసం 10 శాతం మాత్రమేనని తెలుస్తోంది. మరోవైపు ఎన్నికల ప్రచారసభలో.. నిక్కీ సొంత రాష్ట్రం దక్షిణ కరోలినాకు చెందిన నేతలు తన చుట్టూ ఉండేలా ట్రంప్‌ చూసుకున్నారు. తద్వారా న్యూహామ్‌షైర్‌లో జరిగే అంతర్గత ఎన్నికలకు ముందు తన బలాన్ని చాటేందుకు ప్రయత్నించారు. ఈ సభకు రాష్ట్ర గవర్నర్‌, లెఫ్టినెంట్‌ గవర్నర్‌, అటార్నీ జనరల్‌, ట్రెజరర్‌ తదితరులు హాజరయ్యారు. దక్షిణ కరోలినాకు చెందిన రాజకీయ నేతలంతా తన అభ్యర్థిత్వాన్ని సమర్థిస్తున్నారని ట్రంప్‌ పేర్కొన్నారు. మళ్లీ ట్రంప్‌ ప్రభుత్వం ఏర్పడితే అందులో ఎలాంటి పదవిని స్వీకరిస్తారన్న ప్రశ్నకు భారత సంతతికి చెందిన వివేక్‌ రామస్వామి సమాధానమివ్వలేదు. అయితే దేశంలో మార్పులు తీసుకురావడానికి అనేక మార్గాలు ఉన్నాయన్నారు. అమెరికా అధ్యక్ష ఎన్నికల్లో రిపబ్లికన్‌ పార్టీ తరఫున అభ్యర్థిత్వాన్ని ఆశించిన వివేక్‌.. రేసు నుంచి తప్పుకొని, ట్రంప్‌నకు మద్దతు ప్రకటించిన సంగతి తెలిసిందే.