Ukraine Crisis: మేరియుపోల్‌ దక్షిణ భాగం రష్యా చేతికి..!

ఇంటర్నెట్‌డెస్క్‌: ఉక్రెయిన్‌లోని పోర్టుసిటీ  మేరియుపోల్‌ దక్షిణ భాగంలో అత్యధిక మొత్తం రష్యన్లు ఆక్రమించుకొన్నారు. ఈ విషయాన్ని బ్రిటన్‌ రక్షణ మంత్రి శాఖ రోజు వారీ విశ్లేషణ కూడా ధ్రువీకరించింది. ‘‘మేరియుపోల్‌లోని దక్షిణ ప్రాంతమే రష్యన్ల చేతిలో ఉంది. మిగిలిన భాగంలో హోరాహోరీ పోరు కొనసాగుతోంది. రష్యన్ల తీరులో ఎటువంటి మార్పులేదు’’ అని ఆ నివేదికలో పేర్కొంది. కాకపోతే రష్యా దళాలకు అవసరమైన సరఫరాలు మాత్రం సరిపడా అందకపోవడంతో.. వేగంగా ముందుకు కదలడంలేదని ఆ నివేదిక విశ్లేషించింది. 

అంతకు ముందు ఆదివారం నాడు బెర్డెయాన్స్క్‌ నౌకాశ్రయం వద్ద అజోవ్‌ సముద్రంలో రష్యా నౌకపై దాడి చేయడంతో ఆ దళాలు వేగంగా ముందుకు కదలడంలేదని పేర్కొంది. ఈ ప్రదేశం మేరియుపోల్‌కు 50 కిలోమీటర్ల దూరంలో ఉంది. ఈ దాడికి ఉక్రెయిన్‌ దళాలు బాధ్యత స్వీకరించాయి. అమెరికా రక్షణ రంగ నిపుణుడు హెచ్‌ఐ సట్టన్‌ ఇది రష్యాకు పెద్ద ఎదురుదెబ్బగా అభివర్ణించారు. కానీ, వ్యూహాత్మక పరిస్థితిలో ఎటువంటి మార్పుఉండబోదని పేర్కొన్నారు. అజోవ్‌ సముద్రంలో, బ్లాక్‌సీలో ఉక్రెయిన్‌ సరఫరాలను రష్యా సమర్థంగా అడ్డుకొంటోంది.