Ukraine Crisis: ఆ వ్యాధికారక క్రిముల్ని వెంటనే నాశనం చేయండి..!

ఉక్రెయిన్‌కు సూచించిన ఆరోగ్య సంస్థ

జెనీవా: దేశంలో పలు ప్రయోగశాలలలో ఉన్న అధికముప్పు గల వ్యాధికారక క్రిములను నాశనం చేయాలని ఉక్రెయిన్‌కు ప్రపంచ ఆరోగ్య సంస్థ సూచించింది. ఉక్రెయిన్‌లోని పలు ప్రాంతాల్లో రష్యా బాంబుల వర్షం కురిపిస్తోన్న తరుణంలో ఈ సూచన చేసింది. ఈ దాడులతో ల్యాబ్‌లు ధ్వంసమై ఆ వ్యాధికారక క్రిములు వ్యాప్తి చెందే అవకాశం ఉందని, ఆ ఉపద్రవాన్ని నిరోధించేందుకే ఈ హెచ్చరిక చేసింది. 

మానవాళి, జంతుజాలంపై ఈ క్రిములు కలిగించే ప్రభావాన్ని తగ్గించే దిశగా ఈ ప్రయోగశాలల్లో పరిశోధనలు జరుపుతారు. ఇతర దేశాల మాదిరిగానే ఉక్రెయిన్ కూడా వీటిని నిర్వహిస్తోంది. వీటికి అమెరికా, ఐరోపా, ప్రపంచ ఆరోగ్య సంస్థ మద్దతు ఉంది. రష్యా రెండు వారాలుగా ఈ దేశంపై దాడులు జరుపుతుండటంతో ఈ ప్రయోగశాలల భద్రతపై ఆందోళన మొదలైంది. 

కాగా, ఈ ల్యాబ్‌లను ఉద్దేశించి రష్యా వాదనలు వేరుగా ఉన్నాయి. ఉక్రెయిన్‌లో అమెరికా బయోవార్‌ఫేర్ ల్యాబ్‌ను నిర్వహిస్తోందని ఆరోపించింది. యుద్ధ సమయంలో పుతిన్ ప్రభుత్వం తరచూ వాటిపై ఆరోపణలు చేసింది. ఆ ల్యాబ్‌కు చెందిన ఆధారాలను నాశనం చేసే ప్రయత్నాలు జరుగుతున్నాయని తమకు దొరికిన పత్రాలు బట్టి వెల్లడవుతోందని నిందించింది. కాగా, అమెరికా, ఉక్రెయిన్‌ ఈ వ్యాఖ్యలను తీవ్రంగా ఖండించాయి. రష్యా తన జీవాయుధాలను మోహరించేందుకు ఈ వాదనను సాకుగా చూపుతోందని ఆగ్రహం వ్యక్తం చేశాయి. దీనిపై ఉక్రెయిన్ అధ్యక్షుడు జెలెన్‌స్కీ కూడా స్పందించారు. తానో తండ్రినని, తమ గడ్డపై అలాంటి ఆయుధాలు ఎన్నటికీ తయారుచేయబోమని స్పష్టంగా చెప్పారు.