రుగ్వేదంలో ఒక నీతి

సూర్యుడికీ, సంజ్ఞాదేవికీ పుట్టిన కవల పిల్లలు యముడు, యమి. యుక్త వయసు వచ్చిన యమి సోదరుడైన యముణ్ణే ప్రేమించి, బిగి కౌగిలి కావాలంటూ అడిగింది. సోదరీ సోదరుల మధ్య ఈ వాంఛ నీతివిరుద్ధమని యముడు ఆమె కోరికను తిరస్కరించాడు. ‘బ్రహ్మ మనిద్దరినీ మాతృ గర్భంలోనే ఒకటిగా ఉంచాడు. మనుషులకే ఇలాంటి నియమాలు కానీ దేవతలకు కాదు’ అని వాదించింది యమి. నయాన, భయాన లొంగదీసుకోవాలని చూసింది. వారి వాదన యమ యమి సంవాదంగా ప్రసిద్ధి పొందింది. యముడు మాత్రం ఆ అనైతిక కోరికను అంగీకరించక, సోదరిని తిరస్కరించాడు. నీతికే ప్రాధాన్యత ఇచ్చాడు. ఇది యముడి ధర్మ నిష్ఠను తెలియజేయడమే కాదు పరోక్షంగా నీతిని ఉపదేశిస్తుంది. స్త్రీ పురుషులది పవిత్ర బంధమని, వావివరుసలు పాటించాలే గానీ అక్రమ సంబంధాలు కూడదని రుగ్వేదంలోని ఈ ఘట్టం తెలియజేస్తుంది. వేల సంవత్సరాల నాటి ఈ పవిత్ర గ్రంథాల్లో మనం అనుసరించాల్సిన పరమ సత్యాలున్నాయి.

శివలెంక ప్రసాదరావు