ఏంటి ఉపయోగం?

‘భగవాన్‌! ఈ ప్రపంచం శాశ్వతమా కాదా? మరణించిన తర్వాత పునర్జన్మ ఉంటుందా ఉండదా? మీరు ఈ విషయాల్లో మౌనం వహిస్తున్నారు. లేదంటే అవి అవసరం లేని విషయాలని చెబుతున్నారు’ అని బుద్ధుడిని ఓ వ్యక్తి గట్టిగా అడిగాడు. అందుకు తథాగతుడు ఇలా అన్నాడు. ‘లోకం శాశ్వతమా కాదా? అని నీకు చెబుతానని నేనెప్పుడైనా అన్నానా? వాటి గురించి ఎందుకు అడుగుతావు? ఒక వ్యక్తికి విషపూరిత బాణం గుచ్చుకుంది. దాన్ని తీయాలని చూసిన వారితో... ఆ బాణం ఎవరు వేశారు? అది ఏ విషం? దాన్ని ఎవరు తయారుచేశారు? అని ప్రశ్నిస్తూ చివరికి ప్రాణం మీదకి తెచ్చుకున్నాడు. అసలు లోకం శాశ్వతమైనా, కాకపోయినా బ్రహ్మచర్యం పాటించాల్సిందే! జనన మరణాలు ఉన్నాయి. దుఃఖం కూడా ఉంది. దాన్ని పోగొట్టుకునే మార్గం చెప్పాను. నువ్వు అడిగిన విషయాలు బ్రహ్మచర్యం, సత్ప్రవర్తన, పవిత్రత, ప్రశాంతత, ఆనందం, జ్ఞానం పొందేందుకు ఉపయోగపపడవు. అందుకే వాటిని అవసరంలేని విషయాలని అన్నాను. జీవితంలో దుఖం ఉంది. దాన్ని తప్పించుకోవాలి. నేను చెప్పిన ధర్మసూత్రాలను అవలంబించండి. మనోవాక్కాయ కర్మలతో పరిశుద్ధంగా జీవించండి. అప్పుడే జీవితానికి అర్థం, పరమార్థం’ అని చెప్పాడు బుద్ధుడు.

- శాలిని