కరువు కాలంలో చక్రవర్తి ప్రతిజ్ఞ

ఖలీఫా ఉమర్‌ (రజి) ప్రజా క్షేమ సమాచారం తెలుసుకోవడానికి రాత్రిళ్లు మారువేషంలో గస్తీ తిరిగేవారు. అరబ్బులో ఖలీఫా అంటే చక్రవర్తి, దేవుని ప్రతినిధి అని అర్థం. ఓరోజు ఖలీఫా నేతిరొట్టె తింటుండగా మదీనా నుంచి ఒక బాటసారి వచ్చాడు. అతన్ని కూడా ఆహ్వానించగా, ఖలీఫా పక్కన కూర్చుని ఆబగా తింటున్నాడు. బాటసారి తినే పద్ధతి చూసి ఖలీఫా ‘అంత ఆకలిగా ఉందా?’ అనడంతో బాటసారి కళ్లల్లో నీళ్లు తిరిగాయి. ‘ప్రభూ! మా ప్రాంతంలో కరువుకాటకాలు తీవ్రంగా ఉన్నాయి. అంతా ఆకలితో అల్లాడిపోతున్నారు. నెయ్యి తినక ఎంతకాలమైందో!’ అన్నాడు. ‘అయ్యో నా రాజ్య ప్రజలు ఇంతటి కరువులో బతుకుతున్నారా?’ అనుకుని బాధపడ్డారు ఖలీఫా. రాజ్యంలో కరువు తీరేవరకూ తాను నెయ్యి ముట్టనని ప్రతిజ్ఞబూనారు. ఖలీఫాల ఆదర్శ పాలన గురించి చెప్పేటప్పుడు ఉలమాలు ఈ గాథను గుర్తుచేస్తారు.

- తహూరా సిద్దీఖా