బొట్టు ఏ వేలితో పెట్టుకోవాలి?

మన చేతి వేళ్లలో ఒక్కో వేలు ఒక్కో గ్రహానికి నెలవు. నుదుటిపై కుంకుమ దిద్దేటప్పుడు ఉపయోగించే వేళ్లను బట్టి వాటి ఫలితాలు ఉంటాయని శాస్త్రం చెబుతోంది. బొటనవేలు శుక్ర స్థానం. ఈ గ్రహం ఆరోగ్యాన్ని ప్రసాదిస్తుంది. కనుక ఈ వేలితో తిలకం దిద్దుకుంటే ఆరోగ్యం, శక్తి కలుగుతాయి. మధ్యవేలు శని స్థానం. కనుక మధ్యవేలితో తిలకం ధరిస్తే దీర్ఘాయుష్షు ప్రాప్తిస్తుంది. ఉంగరపు వేలు సూర్య స్థానం. ఈ వేలితో బొట్టు పెట్టుకుంటే మనశ్శాంతి, తేజస్సు, శక్తి కలుగుతాయి. అంతేగాక ఆఙ్ఞాచక్రం ఉత్తేజితమై, మేధస్సును మేల్కొలుపుతుంది. దేవుడికి ఈ వేలితోనే తిలక ధారణ చేయాలనేది పురాణవచనం. చిటికెన వేలు బుధుని స్థానం. వాక్సంబంధిత వృత్తులకు బుధుడు కారకుడు. చిటికెన వేలితో తిలకం దిద్దుకుంటే బుద్ధికుశలత కలుగుతుంది. చూపుడు వేలు బృహస్పతి స్థానం. అమరత్వానికి చిహ్నం. మరణించినవారికే ఈ వేలితో తిలకం దిద్దుతారు. అందువల్ల వారికి మోక్షం ప్రాప్తిస్తుంది. ఇతర సందర్భాల్లో ఈ వేలితో బొట్టు పెట్టడాన్ని అశుభంగా భావిస్తారు.

- ఆదిత్య కార్తికేయ