పోషకుడు పరమాత్ముడే!

సమర్థ రామదాసు ఛత్రపతి శివాజీకి సైతం మార్గనిర్దేశం చేశాడు. శివాజీ సమనగఢ్‌ను నిర్మిస్తున్న సందర్భమది. వేలాదిమంది కూలీలు శ్రమిస్తున్నారు. వాళ్లను చూసిన ఛత్రపతి ‘ఇన్ని వేలమంది నా వల్లే బతుకుతున్నారు! నేను గనుక ఈ భారీ నిర్మాణం చేపట్టకపోతే వీళ్లంతా ఏమై పోయేవాళ్లో!’ అని కించిత్తు అహం భావానికి లోనయ్యాడు. ఆ పక్కనే ఉన్న సమర్థ రామదాసు తన మనోనేత్రంతో శివాజీ ఆభిజాత్యాన్ని అర్థం చేసుకున్నాడు. వెంటనే అక్కడ పనిచేస్తున్న ఒక కూలీ చేతిలోని రాతిని తీసుకుని, ఎదురుగా ఉన్న రాతిగోడపైకి విసిరాడు. అక్కడ గోడ పగిలి అందులోంచి ఓ కప్ప బయటకు దూకింది. ఆ దృశ్యాన్ని చూసిన శివాజీ స్థాణువైపోయాడు. ‘ఈ గోడలో చిక్కుకున్న కప్పను ఎవరు బతికిస్తున్నారు? సకల జీవులను పోషించేది పరమాత్మే కదా! ఆయన పోషణ ముందు నా పోషకత్వం ఎంత అల్పమైంది’ అని పశ్చాత్తాపం చెంది గురువుకు పాదాభివందనం చేశాడు.

- ప్రహ్లాద్‌