అదీ ప్రార్థన శక్తి

శత్రువును జయించడానికి ప్రార్థనను మించిన ఆయుధం లేదు. ప్రార్థన రూపంలో దేవుడు మన విన్నపాలను విని, తన చిత్తానుసారం అనుగ్రహి స్తాడు. స్వలాభం కోసమే కాకుండా ఇతరుల కోసం ప్రార్థించినప్పుడు (యోబు 42:10) రెండింతలు ఆశీర్వదిస్తాడు. లియోకార్డ్‌ రేవన్‌ హిల్‌ చెప్పినట్లు కనిపించని శత్రువుతో (సాతాను), అణగార్చే శక్తులతో పోరాటమే ప్రార్థన. ఇది మహా పదునైన ఆయుధం. ఉపవాస ప్రార్థన, ఏకాంత ప్రార్థన, కుటుంబ ప్రార్థన- మూడూ అభిలషణీయమే.

ప్రార్థనతో యెహోషువా అనే భక్తుడు ఆకాశంలో సూర్యచంద్రుల్ని కదలకుండా (యె.10:12) చేశాడు. హిజ్కియా ప్రార్థించగా యెహోవా తన దూతద్వారా లక్షా ఎనబై ఐదు వేలమంది శత్రువులైన అష్షురీయులను సంహరించాడు. సొబొమోను రాజు ప్రార్థన చేసి అపార జ్ఞానాన్ని పొందాడు. రాజైన నెబుకడ్నెజరు కలలోని భావాన్ని డానియేల్‌ ప్రార్థన వల్లనే వివరించగలిగాడు. కనుక ప్రార్థన ఇచ్చే దివ్య శక్తితో ప్రతిబంధకాల నుంచి విడుదలవుతాం. మోకాళ్లపై కూర్చుని దేవుడికి మొరపెట్టుకోవడం అత్యుత్తమ ప్రార్థన. క్రీస్తు రాత్రంతా కొండపై ప్రార్థన చేసి ఉదయం సువార్త పనిలో ఉండే వాడు. ఒక్క మాటలో చెప్పాలంటే ప్రార్థన ఆటంకాలన్నింటినీ తొలగించి అనుకూల పరిస్థితు లను ఏర్పరుస్తుంది.

మర్రి ఎ.బాబ్జి