సలామ్‌ చేసేందుకు బజారుకు

హజ్రత్‌ అబ్దుల్లాహ్‌ బిన్‌ ఉమర్‌ (రజి) ఎదుటి వ్యక్తి తారసపడగానే సలామ్‌ చేయడంలో ముందుంటారు. ఒకసారి హజ్రత్‌ తుఫైల్‌ (రజి) ఆయన ఇంటికి వెళ్లారు. అప్పుడాయన ‘బజారుకు వెళ్దాం పదండి’ అన్నారు. అందుకు తుఫైల్‌ ‘అయ్యా! మీరు బజారుకు వచ్చి ఏం చేస్తారు? ఏ వస్తువూ కొనుగోలు చేయరు. పోనీ నలుగురితో కలిసి కూర్చుని కబుర్లు కూడా చెప్పరు. అంతదూరం నడిచి వెళ్లడం ఎందుకు, వృథా ప్రయాస. ఇంట్లోనే కూర్చుని సరదాగా మాట్లాడుకుందాం’ అన్నారు. అప్పుడాయన ‘తుఫైల్‌! మనం కేవలం సలామ్‌ చేసేందుకు బజారుకు వెళ్తున్నాం. ఎవరు ఎదురుపడినా సరే.. వారికి సలామ్‌ చేద్దాం’ అన్నారు. సలామ్‌ అంటే శాంతి. ముస్లిమ్‌లు పరస్పరం ఎదురైనప్పుడు ‘అస్సలామ్‌ అలైకుమ్‌’ అని అభివాదం చేయాలి. దానికి జవాబుగా ‘వ అలైకుమ్‌ అస్సలామ్‌’ అని పలకాలి. ఎదుటివారి శాంతి, శ్రేయస్సులను కోరుకోవడమే సలామ్‌ ఉద్దేశం. ముందుగా సలామ్‌ చేసేవారికి ఎక్కువ పుణ్యం దక్కుతుంది.

ఖైరున్నీసాబేగం