స్వర్గంలో నాయకురాలు

ప్రవక్త గారాల కుమార్తె హజ్రత్‌ ఫాతిమా(ర.అ) ఒకసారి తండ్రి ముహమ్మద్‌ ప్రవక్త(సఅసం) ఇంటికెళ్లగా ‘రా అమ్మా!’ అంటూ స్వాగతం పలికారాయన. పక్కన కూర్చోబెట్టుకుని, ఆమె చెవిలో ఏదో చెప్పారు. అది విని ఆమె ఏడుపు మొదలెట్టారు. మళ్లీ దైవప్రవక్త(స) ఆమె చెవిలో ఏదో రహస్యం చెప్పారు. ఈసారామె నవ్వారు. ప్రవక్త(స) పరమపదించిన తర్వాత.. గతంలో తండ్రిగారు చెవిలో చెప్పిన విషయం గురించి అడిగినవారికి.. ‘అమ్మా! హజ్రత్‌ జిబ్రాయీల్‌ దూత ప్రతి సంవత్సరం నాతో ఒకసారే ఖురాన్‌ పారాయణ చేయించేవారు. ఈ ఏడాది రెండుసార్లు పారాయణ చేయించారు. అందువల్ల నా మరణకాలం సమీపించిందనే ఆలోచన దృఢ మైంది. అయితే మన కుటుంబసభ్యుల్లో అందరికన్నా ముందు వచ్చి నన్ను కలుసుకునేది నువ్వే’ అన్నారు. ఆ మాట వినగానే దుఃఖం వచ్చింది. అప్పుడాయన ‘స్వర్గంలోని స్త్రీలకు నువ్వే నాయకురాలివి అవుతావు. ఇది నీకు సంతోషం కాదా?’ అన్నారు. ఆ మాట విని నవ్వేశాను’ అంటూ చెప్పారామె.

తహూరా సిద్దీఖా