Marriage: పెళ్లి కాలేదంటే.. అంతే ఇక!

రాముడు, శివుడు, కృష్ణుడు.. అందరినీ సతీసమేతంగా పూజిస్తాం. మన సంస్కృతిలో ఏ కార్యక్రమాలైనా.. ఆలుమగలు కలిసి నిర్వర్తించాలనే నియమం ఉంది. జీవితంలో పెళ్లికి అంత ప్రాముఖ్యముంది. ధర్మానుచరణలో ఒకరికొకరు తోడూనీడగా ఉండాలనేదే అంతరార్థం. వైవాహిక జీవిత ఆవశ్యకతను చాటుతూ డెన్మార్క్‌లో ఒక చిత్రమైన ఆచారం ఉంది. పాతికేళ్లు నిండినా.. ఇంకా పెళ్లి కాలేదంటే.. అభిషేకం చేసినట్లుగా తల మీద నీళ్లు కుమ్మరిస్తారు. తర్వాత తల నుంచి పాదాల వరకూ దాల్చిన చెక్క పొడి జల్లుతారు. ఇందులో స్త్రీ పురుష వ్యత్యాసం లేదు. ఎవరికైనా ఇదే వర్తిస్తుంది. ఆ దేశంలో వందల సంవత్సరాలుగా ఈ ఆచారం కొనసాగుతోంది. దీని వల్ల ఫలితం ఏమిటో తెలియకున్నా.. ఎవరూ వ్యతిరేకించరు, శిక్షగా భావించరట. నయం.. ఇలా మనదేశంలో లేనందుకు సంతోషిద్దాం.. దాల్చినచెక్క చాలా ఖరీదు మరి.