మహా వైద్యుడాయన!

లోకంలో మొట్టమొదటి వాడైన ఆదాముకు దేవుడు గాఢనిద్ర కల్పించి, పక్కటెముక తీశాడు. ఆ వెలితిని మాంసంతో పూడ్చేశాడు. అయినా ఆదాముకు నొప్పి (ఆది 2:21) కలగలేదు, మెలకువ రాలేదు. వైద్య పరిభాషలో చెప్పాలంటే యెహోవా మత్తుమందు నిపుణుడిగా, శస్త్రవైద్యునిగా- రెండు పనులు నిర్వహించాడు. అలా తీసిన ఎముకను స్త్రీగా రూపొందించి, ఆదాము దగ్గరికి తీసుకొచ్చాడు. ఒక జీవి జన్మించాలంటే రెండు జీవుల కలయిక తప్పనిసరి. కానీ ఎముకతో జీవిని సృష్టించడం అసంభవం. బైబిల్‌ను విశ్వసించని వాళ్లు దీన్నెలా నిరూపిస్తారు? శతాబ్దాల తర్వాత క్లోనింగ్‌ ప్రక్రియ కనిపెట్టారు. ఈ శాస్త్రీయ అంశానికి సంబంధించి ఇంకా పరిశోధనలు సాగుతున్నాయి. దేవుడు ఆ పని ఎన్నడో చేశాడు. అలాగే కన్య అయిన మరియ గర్భం దాల్చింది. ‘అది పరిశుద్ధాత్మ మహిమ అని, ఆమెని అవమానించ వద్దు’ అని (మత్త 2:20) మరియ భర్తకు ప్రభువు వివరించాడు. ఏ పరీక్షలూ చేయకుండానే గర్భిణి అని, మగ శిశువు పుడతాడని చెప్పాడు. అలా ప్రసూతి నిపుణుడు అయ్యాడు. ఇన్ని అద్భుతాలు చేసిన దేవుడు.. వైద్యులకే వైద్యుడు. కనుక ఏదైనా అనారోగ్యం కలిగితే ఏసుక్రీస్తును స్మరించి, ఉపశమనం పొందుదాం.

మర్రి ఎ.బాబ్జి