వీరేనా దైవరాజ్య వారసులు!

క్రీస్తువాణి

తన చుట్టూ ఉన్న పెద్దలకు.. అర్థం కాని ఆధ్యాత్మిక అంశాలను లోతుగా చర్చించి వివరించి చెప్పేవాడు ప్రభువు. ఆయన ఎక్కడికి వెళ్లినా.. జనం తండోపతండాలుగా వచ్చి.. ఆ హితబోధలు వినేవారు. ఆయన ఆశీస్సుల కోసం చిన్నపిల్లల్ని ఎత్తుకొని మైళ్ల కొద్దీ నడిచి వచ్చేవారు. సుదూరంగా ఉన్న గ్రీసు ప్రాంతం నుంచి కూడా అక్కడికి చేరేవారు. ప్రభువును తాకినా, ఆయన ఆశీర్వాదం పొందినా, సర్వ శుభాలూ కలుగుతాయని బలంగా నమ్మేవారు. ఒకసారి పరస్పరం తోసుకుంటూ వస్తున్న జనాల్ని, తమను ఏసు వద్దకు పంపమని బతిమాలుతున్న తల్లిదండ్రుల్ని ఏసు ప్రభువు గమనించాడు. శిష్యుల వంక చూసి.. ‘వాళ్లనెందుకు అడ్డుకుంటున్నారు? నా చెంతకు రానీయండి!’ అని మెల్లగా మందలించాడు. చిన్నారులను ముద్దాడి, అక్కున చేర్చుకొని.. ‘ఇలాంటివారిదే దేవుని రాజ్యం’ అంటూ తల నిమిరి, ఆశీర్వదించాడు. ‘వయసు పెరిగినా కూడా.. కపటం, కల్మషం లేకుండా పిల్లల్లా ఉండాలి. లేకుంటే దైవ రాజ్యం చేరుకోలేరు. మీరంతా పసిబిడ్డల్లా ఉండండి’ అంటూ ప్రబోధించాడు ఏసు.

డా.దేవదాసు