శాంతిః శాంతిః శాంతిః

యజుర్వేదంలోని బృహదారణ్యక, ఈశావాస్య, తైత్తిరీయ తదితర ఉపనిషత్తుల లోని శాంతి మంత్రాలను పఠించి, చివరలో ‘ఓం శాంతిః శాంతిః శాంతిః’ అని శాంతి పదాన్ని మూడుసార్లు ఉచ్చరిస్తాం. అందులో- మొదటి ‘శాంతి’ పదం మనం మనచుట్టూ ఉన్నవారు, పరిసరాలు బాగుండాలని కోరడం. అంటే శారీరక, మానసిక అనారోగ్యాల నుంచి ఉపశమనం పొందేందుకు దేవుడి అనుగ్రహం, ఆశీస్సులు ఉండాలని ప్రార్థించడం. దీన్నే ‘ఆధిదైవిక’ అంటారు. రెండో ‘శాంతి’ పదం పశుపక్ష్యాదులు, ఇతర జీవరాశుల నుంచి ఏ విధమైన ఆపదలు, ముప్పు సంభవించకుండా సురక్షితంగా ఉండాలనే ప్రార్థన. దీన్ని ‘ఆధిభౌతికం’ అంటారు. మూడో ‘శాంతి’ పదం ప్రకృతి పరంగా సంభవించే భూకంపాలు, అగ్ని ప్రమాదాలు, వరదలు, తుపానులు మొదలైన ఉపద్రవాల వల్ల మనకు ఎలాంటి ఆపదలూ కలగకుండా ఉండాలనే ప్రార్థన. దీన్ని ‘ఆధ్యాత్మికం’ అంటారు. ఈ మూడు రకాలైన ఆపదల నుంచీ రక్షించమని వేడుకుంటాం అన్నమాట. మన ఆలోచనలు, మనం పలికే పదాలు, విశ్వంలోకి వెళ్తాయని వేదాలు చెబుతున్నాయి. ఈ విధంగా నిత్యం లక్షలాదిమంది శాంతి మంత్రం చదివితే.. విశ్వశాంతి తప్పక చేకూరుతుంది.

డా.టేకుమళ్ల వెంకటప్పయ్య