జీవుని దుఃఖం పోవాలంటే..

జీవునికి శరీర ధారణ వల్ల దుఃఖం కలుగుతుంది. పూర్వం చేసిన కర్మల కారణంగా ఈ శరీరం ప్రాప్తిస్తుంది. మనకు ఇతరుల పట్ల ఏర్పడే రాగద్వేషాదుల వల్ల కర్మలు కలుగుతాయి. మన అజ్ఞానం వల్ల రాగాదులు కలుగుతున్నాయి. ఈ అజ్ఞానం పోవాలంటే జ్ఞానాన్ని ఆర్జించాలి. తన నిజమైన స్వరూపాన్ని మరవడం వల్ల దుఃఖం కలుగుతుంది. జ్ఞాన సముపార్జనతో దుఃఖం నుంచి బయటపడొచ్చు అనేది నిశ్చయం. భగవద్గీత జ్ఞానయోగంలో శ్రీకృష్ణ పరమాత్ముడు- జ్ఞాన తపస్సుతో పవిత్రులు కావాలి, జ్ఞానయజ్ఞంతో ముక్తిని పొందాలి, జ్ఞానాగ్నిని రగిలించి కర్మలు అనే కట్టెలను దగ్ధం చేయాలి, జ్ఞానఖడ్గంతో సంశయాలు అన్నిటినీ ఛేదించాలి, జ్ఞాన దీపాలను వెలిగించి అమృతప్రాయమైన కాంతిని వెదజల్లాలి- అంటూ ఉపదేశించాడు. ఇలా జ్ఞానాన్ని తపస్సు, యజ్ఞం, అగ్ని, ఖడ్గం, దీపం- అంటూ వివిధ రకాలుగా చెప్పాడు. ఒక్క మాటలో చెప్పాలంటే- దుఃఖ నివృత్తికి జ్ఞాన సముపార్జన అత్యంత ఆవశ్యకం.

శివలెంక ప్రసాదరావు