త్యాగ దాన ప్రస్థానం

శ్రమ దినాల సందర్భంగా..

ఏసు ప్రభువు యోర్దాను నది నుంచి అరణ్యంలో 40 రోజులు నిద్రాహారాలకు దూరమై ప్రయాణించాడు. ఆయన్ను తప్పు చేయమని, మార్గం మార్చుకోమనీ సాతాను శత విధాల చెప్పినా ప్రభువు మాత్రం నియమం తప్పలేదు. (లూకా4:2) అలాగే ఇజ్రాయెల్‌ దేశస్థులు ఐగుప్తు దేశంలోని చెర నుంచి విమోచనులై తమ ప్రాంతాలకు చేరేందుకు కొండలూ కోనలూ, లోయలూ, వాగులూ వంకలూ దాటుకుంటూ.. 40 ఏళ్లు ప్రయాణించారు. ఈ కాలంలో వాళ్లు ఎదుర్కొన్న కష్టాలు, పరీక్షలూ అన్నీ ఇన్నీ కాదు. క్రీస్తు ప్రయాణం 40 రోజులైతే, ఇజ్రాయెల్‌ వాసుల ప్రయాణం నాలుగు దశాబ్దాలు. ఆ సంఖ్యను అనుసరించి క్రైస్తవ సమాజం క్రీస్తు మరణ పునరుత్థానాలకు ముందు నుంచే ఇలా శ్రమదినాలు పాటించడం ఆనవాయితీ అయ్యింది. ఇందులో- ఉపవాస ప్రార్థనలు, గత దోషాలకు పశ్చాత్తాపం చెంది, వాటిని సరిదిద్దుకోవడం, సమాజానికి హితం చేయడం.. అంటే దాన ధర్మాలు, త్యాగ కృత్యాలు.. అనే ప్రధాన అంశాలుంటాయి. వీటిని ఎంత శ్రద్ధగా పాటిస్తారో అంతగా క్రీస్తు పునరుత్థాన ఫలాలు అందుతాయి. మనసులోని చీకటి తొలగి, కాంతులు ప్రసరిస్తాయి. లేకుంటే, ఈ శ్రమదినాలు గానీ ఈస్టర్‌ పండుగ గానీ దండగే. నామ మాత్రంగా ఉండిపోతుంది.

డా.ఆర్‌.వి.దేవదాసు