ప్రదోషకాల పూజకు ఫలితం అధికం

‘ఓం నమః శివాయ’ అని స్మరిస్తే చాలు కరిగి పోతాడు పరమశివుడు. భక్తితో ఓ సుమం సమర్పించినా సంతుష్టుడు ఔతాడా మంజునాథుడు. ఇక స్వామికెంతో ప్రీతి కరమైన ప్రదోష కాలంలో పూజిస్తే విశేష ఫలితాలు ఉంటాయి. ప్రతిరోజూ సూర్యాస్తమయ సమయంలో చంద్రుడి కదలికల వల్ల ఏర్పడేదే ప్రదోషం. కృష్ణపక్షంలో చతుర్దశి రోజు మాస శివరాత్రి వస్తుంది. దాని ముందురోజు త్రయోదశిని మహా ప్రదోషకాలం అంటారు. శుక్లపక్ష త్రయోదశి నాటి పూజలకు కూడా సత్ఫలితాలుంటాయి. ప్రదోషమంటే పాప నిర్మూలన. తెలిసీ తెలీక చేసే పాపకర్మల వల్ల ప్రతిబంధకాలను కొని తెచ్చుకున్నట్లవుతుంది. దాంతో పురోభివృద్ధికి ఉన్న అవకాశాలు పరిమితమౌతాయి. ఆ పాపకర్మలు నిర్జీవం కావాలంటే, దానికి తగ్గ పుణ్యకర్మలు చేయాలి. పరమశివుడు ప్రమథగణాలతో కొలువయ్యుండే ప్రదోషకాలంలో శివుని స్మరిస్తే మన పాప కర్మల ఫలాన్ని తాను స్వీకరించి కష్టాలను తొలగిస్తాడనేది భక్తుల నమ్మకం.    

- బి.వెంకటేష్‌