దీర్ఘకాల మూర్ఛతో మతిమరుపు!

ఎప్పుడో పదేళ్ల క్రితం స్నేహితుడి ఇంటిని చూశారు. మళ్లీ ఇప్పుడే అక్కడికి వెళ్లటం. అయినా సరిగ్గా ఆ ఇంటికే వెళ్తాం. చుట్టుపక్కల చెట్లు, కట్టడాలు, దారుల సాయంతో దాన్ని పోల్చుకుంటాం. ఆయా స్థలాల పరిసరాల సమాచారం మెదడులో నిక్షిప్తం కావటం వల్లనే వాటిని గుర్తుపెట్టుకోవటం సాధ్యమవుతుంది. దీర్ఘకాలిక మూర్ఛతో బాధపడేవారిలో ఇలాంటి జ్ఞాపకశక్తి కొరవడుతున్నట్టు యూనివర్సిటీ ఆఫ్‌ బాన్‌ పరిశోధకుల అధ్యయనంలో బయటపడింది. ఎలుకలపై పరిశోధన చేసి ఈ విషయాన్ని గుర్తించారు. జ్ఞాపకాలను.. ముఖ్యంగా స్థలాలకు సంబంధించిన సమాచారాన్ని విడమరచుకోవటంలో  మెదడులోని హిప్పోక్యాంపస్‌ భాగం కీలకపాత్ర పోషిస్తుంది. ఇందులో ‘స్థల కణాల’ వంటివి ఉంటాయి. ఇవి మనం చూసిన ప్రాంతాలను గుర్తు తెచ్చుకోవటానికి తోడ్పడతాయి. ఎలుకల హిప్పోక్యాంపస్‌లో సుమారు 10 లక్షలకు పైగా ఇలాంటి కణాలుంటాయని పరిశోధకులు చెబుతున్నారు. వీటిల్లో ప్రతి ఒక్కటీ ఆయా పర్యావరణ స్వభావాల సమ్మేళనాన్ని గుర్తిస్తాయని, దీర్ఘకాల మూర్ఛతో ఈ కణాల మధ్య అను సంధానాలు దెబ్బతింటున్నాయని వివరిస్తున్నారు.